台語與我　　　　　 普103 第2組 B88303137　
當初，beh上這門課e5彼時陣，心內著真猶豫不決，因為我e5台語講了無
蓋好，好佳哉我e5同學台語攏講了真好，有伊予我靠，有卡安心一點仔。看著
仝一班e5同學寫e5文章，感覺著差不多每一個人攏是講台語大漢咧，但是我m7
是。
我阿嬤是對大陸來e5（伊腔口真重），外嬤是鹿港人，所以我細漢e5時kah4　
in 序大人講話，攏需要爸爸媽媽作翻譯。佇阮厝裡面大部分是講華語，因為我
爸爸伊聽無台語嘛boe7曉講（我是感覺伊無講台語e5"慧根"啦，伊聽了beh二十
年嘛有去學過，這碼猶是聽無傷有，講e5話嘛li-li-lak4-lak4）。
猶m7閣kah4讀國民學校進前，我是予外嬤chhoa 大漢咧，kah4 表兄 in 鬥
陣thit-tho5，in kah4 in 阿公 toa3 作夥，台語講了 sia7-sia7-叫，若是我
台語講了m7對，in tioh8會笑我，所以我攏無愛講台語，這碼想起來實在是真
無彩。讀冊了後，我干單kah4 外嬤講話 e5 時陣才會講台語，有時陣連手嘛
theh8 起來比，後來伊華語聽卡有囉，我對著boe7曉講e5字嘛kah4伊講華語。
這碼，因為佇學校上鄭教授e5課，我kah4仝班e5同學會用台語拍嘴古，
轉去外嬤in兜嘛會使用台語kah4伊開講，伊攏會笑我講「beh學台語那有需要
去學校咧，我教你tioh8好阿」，這陣時我會笑允好，問伊課堂上我boe7曉講e5
字。
　　我是感覺，學語言真正是對聽、說、讀、寫e5步驟一步一步來e5，像華語、
台語，因為自細漢時聽了慣勢，慢慢仔會曉講，所以ㄅ、ㄆ、ㄇ kah4 羅馬字干
單是幫助阮來學習e5工具，予阮卡方便，嘛卡有一個標準。反倒轉來講，像英
語這卡無熟識e5語言，學起來tioh8卡困難囉，干單學曉２６個a、b、c kah4　
”音標”，才來學「按怎聽」英語，根本是”本末倒置”e5做法。
　　
　　上了規學期e5課，我實在真歡喜有這咧機會重新來熟識台語！！！