公視新聞網 https://news.pts.org.tw/article/671456
動物伴受重視 廟寺也鬥點光明燈.設牌位超度
鍾依憓 邱紹揚/高雄報導
發布時間：2023-12-14 19:15 更新時間：2023-12-15 08:30
https://www.youtube.com/watch?v=HSuWDdmFP30
根據農委會統計，今年寵物登記數量大約有21萬外，寵物成做咱人上重要的陪伴，這馬宮
廟毋但有替寵物點光明燈，連寵物過身，也有宮廟共唸經超度。
廟宇內底真濟法師佇咧唸經，詳細看，這區的牌位真無仝，寫的是動物兩字，這馬宮廟毋
但替祖先超拔度化，高雄這間東照山也特別佇法會中替寵物亡靈設壇，予主人會當替過往
的寵物超度祭拜，宮廟是比照祖先的科儀，會專工替寵物做牌位，連飼料嘛攏會攢便便。
高雄東照山關帝廟主委潘献有講:「比照祖先的科儀做攏仝款，但是阮有另外做一个牌位
，這動物靈的牌位，攏仝款囥佇祖先邊仔，阮嘛是用狗仔欲食的物件，阮嘛是會用。」
東照山表示，今年攏總有三百外个主人報名，欲替厝內貓仔狗仔超拔，根據農委會統計，
今年狗仔貓仔登記數已經有21外萬，現代人生囝少，動物伴成做厝內重要成員，真濟民眾
認為，這是未來的趨勢。
民眾講:「這馬這个年代，真濟人飼寵物，阮感覺是一種新的流行。」、「阮覺得會當予
伊佇另外一爿，嘛會當過較順序，可能較無煩惱，佇人間會當將人間的一寡煩惱，莫紮到
另外一爿去。」
毋但有宮廟照顧動物往生的代誌，嘉義城隍廟，今年嘛有替動物點光明燈，毋但有狗仔貓
仔，閣有烏龜、蛇等等的寵物，可見主人希望城隍爺，會當保庇人佮寵物攏平安健康。
張曼亭/編輯