https://news.pts.org.tw/article/565766
臺語網路學習平台 課程內容豐富閣趣味
郭柏均 林郁凱 / 臺北報導 發布時間：2022-01-30 19:15 更新時間：2022-01-30 21:12
https://www.youtube.com/watch?v=PoZxQd0CJL4
這馬學台語當時行，除了學校的母語課程，這馬有一个線頂學習平台，除了台語基礎教學
，嘛有音樂、天文、醫療等等，各方面的台語教學，欲予逐家用輕鬆、趣味的方式來學台
語，咱做伙來看覓。
Tutor講臺語老師曾偉旻：「來幫我唸一下 thua，th ua thua。」
用電腦，佇線頂學台語的聲母。捌主持台語新聞節目的曾偉旻，這馬成立線頂台語學習平
台，民眾免受時間佮地點的限制，攏通學台語。曾偉旻講，來平台學習的，毋但台灣的母
語家庭，閣有濟濟無仝的需求。
Tutor講臺語老師曾偉旻：「親像有一个學生囡仔，是來自愛丁堡語言學的博士，伊為著
欲精進，可能嘛有研究上的需求，所以伊的臺羅佮漢字攏寫了袂。親像有一个臺灣真優
秀的人才，嫁去到英國，伊為著欲予伊六歲佮四歲的囡仔學臺語，伊透過這个線頂課程，
親像我共伊教Pokemon，佇遮佮伊用的開講的方式。」
除了一般的臺羅、漢字教學，平台嘛邀請各種專業的老師做陣參與，教各種台語用法。
Tutor講臺語老師曾偉旻：「咱會當用台文來教天文，來教地理，咱嘛有朱子宏醫師，會
當用醫學台語的方式 來教台語，另外咱嘛會使用台語來教音樂。」
學者表示，透過這種方法，會使予台語行入生活，符合台語正常化的潮流。
臺灣師範大學臺灣語文學系系主任許慧如：「逐家想著台語 就干焦想著台語課，就是學
台語 講話，但是其實台語毋是外國，
伊是咱遮的語言，台語一定愛行出台語教學，用台語去做各種的代誌，去做研究 去談論
各種的主題。」
許慧如講，向望台語線頂教學平台繼續發展，除了基礎教學，嘛會使發展出通譯、文學等
等各款面向的課，就親像各款外國語言仝款，向望台語多元發展。