︱據稱因有觀眾投訴站立擋視線︱
有目擊事件觀眾表示：「一開場個男仔就企起身，後幾行有位女士叫咗好多次『坐低』﹐個男仔冇理。有個保安姨姨勸佢坐低﹐佢冇理，之後有一兩個黑色西裝保安都埋去勸佢坐番低，但佢堅持唔肯坐。」
該名觀眾指，當時再有一名疑是工作人員上前勸他坐下，不得要領，最後幾名保安合力將之抬走，有保安拍片記錄過程。據了解﹐被抬走的橙衣男子最後有返回現場﹐繼續欣賞。另一位觀眾指：「之後半邊場去到最後一首歌之前，都冇人敢再企起身。」
亞博場館守則列明禁止觀眾站於座位上， 另根據亞博官方網站YOASOBI ASIA TOUR「注意事項」第35條，「持票觀眾務必遵守主辦方及場館的各項規定。如有干擾活動進行之行為，主辦方有權請其離場。」有留言稱：「咁呢個係坐位嚟，佢企起身係會阻住其他人視線，勸佢坐番低而佢唔肯，保安做嘢都冇錯㗎喎！」但亦有不少留言指，睇J-POP因應氣氛、表演者號召起身，鮮少坐低打call。
另有觀眾表示因為坐區的「群眾壓力」，沒有人敢站立，「我個Block冇人企，搞到我都唔敢企，體驗感真係差啲。」「 #藤井風 場（本月初亞博ARENA舉行）都係全場企，YOASOBI場搞啲咁嘅國際笑話。」
︱觀眾全程舉高電話拍片
嚴重阻礙視線︱
企身阻後排視線，高舉電話拍片一樣嚴重，但保安並無禁止。YOASOBI 早前於大阪、東京公演，主辦方允許觀眾使用智能電話拍攝；至於香港亞博站，「注意守則」列明「表演場內不准進行未獲授權的攝影、錄影及錄音。」惟場內觀眾拍攝，保安並未阻止。
有苦主買企位貴飛，全晚一直被前排男觀眾高舉電話拍片block視線。該名男觀眾直、橫mode兼施，每次拍片逾時兩分鐘﹐開場拍了五分鐘短片。苦主感謂：「睇演唱會manner，係要投入enjoy﹐識唱一齊唱。拍片唔係唔得，十幾秒夠皮啦，阻住人真係好咩？」
︱Panel位器材封視線︱
亞博ARENA舉行之演唱會或表演，panel位大多設於Block 9。過往ARENA開騷，主辦方大多會預留該區A行至I行左右圍黑布，不設發售，免阻礙觀眾視線。
昨晚有觀眾坐在panel位後、Block 9 B行，一直被器材擋視線，迫於無奈要企起身欣賞，體驗極差。事主嘆：「好多手機﹐好多人唔識call，零出聲。唱《優しい彗星》都唔自動波開手機燈，亞博音響堅流。」
翻查資料，主辦亦有發售Block 9 A行，即panel之後。亞博「注意事項」33條：亞洲國際博覽館管理有限公司作為場地提供者不能保證參加者的視野在活動中完全不受任何阻礙。
︱嘆觀眾安靜欣賞如兵馬俑
只顧拍片po IG︱
有回應感謂，YOASOBI唱《群青》時，「竟然冇一個人識得合唱，得我自己一個唱。隔籬左右淨係識喺度拍片，啲人睇真係為咗po IG。」留言笑指有些觀眾全場如 #兵馬俑 ，或只顧錄影。
樓下企位一樣bad trip：「首首都錄足，有時仲要係舉正喺我塊面前面。其實不如上去坐位？點解要咁辛苦企喺度錄？有啲仲拎埋自拍棍。」有企位區的觀眾累了想坐地小休，即遭保安喝令禁止，不過注意事項並無列明禁止企位區觀眾坐地下。