跨足飲食版了, 對要吃又要靚的Kit有多誘惑呢?
讓我們繼續看下去:
http://www.eastweek.com.hk/index.php?aid=17693
(未俾錢, 店家菜色自動神隱)
龍年伊始，「Paco巨星飯堂」請嚟兩位重份量嘉賓：趙增熹、陳潔儀（Kit），一位係音
樂才子，一位則係新加坡國寶級女歌手，為你哋提供龍年音樂上嘅高格調享受！事關阿熹
同阿Kit將會喺2月11、12號，舉行一連兩晚嘅《陳潔儀×趙增熹傾城音樂會》，兩大高手
合作，係樂迷嘅最大收穫！
多方位重繹
阿熹同阿Kit嘅演唱會將於會展舉行，佢哋啱啱擬定咗初步嘅rundown，仲開始一齊坐喺鋼
琴前夾吓唱每首歌嘅感覺，要以最靚姿態示人，為歌曲作重新編排。講到演唱會名「傾城
」，阿熹就話：「今次我哋想簡單直接啲，我諗過用『深動』，咁就完全解釋晒我哋想做
嘅嘢，就係一次好深刻、好感動人心嘅音樂會。
「不過，當我去咗新加坡睇阿Kit嘅演唱會之後，就有咗一啲新嘅idea，想轉用『傾城』
嘞，而因為阿Kit亦都好鍾意，所以就揀咗呢個名。用呢名，perspective可能同之前有少
少唔同，但係都有最初講嗰種『深動』嘅感覺，係冇講到咁白啫。」
兩位主角異口同聲話音樂會將純以音樂出發，亦有管弦樂團伴奏，阿熹就會專注於音樂部
分，阿Kit就揀選佢最愛同唱得最有feel嘅歌。舊年阿Kit自資出碟，而阿熹亦有友情為老
友製作其中幾首歌曲，亦間接促成今次嘅高手過招，「阿熹幫我隻碟嘅一啲歌重新編曲之
外，其實舊年我同幾位歌手一齊喺阿熹嘅《分子音樂盛宴》唱歌，佢話聽我唱兩三首歌唔
夠喉，仲話就係因為上次唔夠喉，所以今次要延續上次嗰種high嘅感覺。哈哈！」
赴法國籌備
我一直都好欣賞兩位音樂人，而我同阿Kit亦曾經係戰友，對於佢嘅靚聲，我亦相當熟識
，而阿Kit亦率先透露音樂會嘅「陳潔儀的名單」：「好多歌我都好想趁今次嘅機會，現
場演繹一次，其中我嘅歌就一定唔少得嘅好似〈心痛〉、〈傷了和氣〉、〈擔心〉、〈等
了又等〉咁，都會用阿熹全新編排嘅版本唱。另外，仲有我喺《重譯》隻碟入面唱過嘅〈
今生今世〉，同埋我哋為今次音樂會而創作嘅〈傾城〉，一講起我已經好excited！」
哈哈哈！我都聽得好興奮，其實我最欣賞兩位對音樂嘅熱誠，阿Kit嘅《重譯》大碟，仲
有佢之前喺新加坡舉行嘅演唱會，都係由佢自資出品，而今次嘅音樂會，阿Kit同阿熹都
有自掏腰包，成就自己嘅音樂夢，少啲熱誠都難以成事。
依家音樂會舉行在即，佢哋都密鑼緊鼓積極籌備，務求以最佳狀態示人。阿熹話：「新年
前，我同音樂會嘅贊助商去咗法國，主要係拍短片喺音樂會播，咁我都會順便叉一叉電，
為嚟緊2月嘅綵排做最佳準備。」
撈起賀新年
至於阿Kit就為咗保養靚聲，佢唔敢刺激聲帶，已經開始戒食最鍾意嘅辣食，不過，時值
農曆新年，佢話：「我都會偷偷哋食我最愛嘅年糕，食少少適可而止，我諗都OK嘅。新加
坡嘅新年，其實同香港一樣，嗰度多中國人，都係一樣慶祝農曆新年，唔同嘅就係，我哋
過年會食魚生撈起，即係將一啲生魚片，撈埋生菜絲、西芹絲、紅蘿蔔絲同酸梅膏加桔子
汁，咁個撈魚生除咗有白色同黃色之外，仲有紅色、綠色同金黃色，好七彩繽紛，又夠晒
喜氣洋洋。
「食呢個菜嘅時候，仲要所有人一齊用筷子夾起，撈勻全部材料，仲要一邊撈一邊話『撈
起撈起』，或者係一啲吉利嘅說話，最好係盡量夾得高啲，先有撈起嘅意思。」
哈哈哈！咁我都預祝阿Kit同阿熹嘅音樂會，愈撈愈起！乾！
阿熹接住補充：「今次要好好咁將阿Kit揀嘅歌，現場演繹一次，好似上次《分子》一樣
，唔會有其他花巧嘢，只要perform到嗰種境界，觀眾應會接受嘅。我唔貪心，唔會要求
全部香港人都鍾意一個咁嘅形式嘅演唱會，只要有一班人鍾意，我就已經好滿足。」