公視新聞網 https://news.pts.org.tw/article/744229
紅包橐仔烏白擲 新竹大坪頂靈骨塔環境垃圾
發布時間：2025/3/27 19:15 更新時間：2025/3/27 22:49
張君豪 / 地方報導
https://www.youtube.com/watch?v=pKVUY_UzdcY
後禮拜就是清明，最近培墓的民眾愈來愈濟，毋過佇咧新竹大坪頂公有靈骨塔路邊，這站
仔煞出現，民眾培墓了後，烏白擲紅包橐仔，造成環境垃圾。民俗專家指出，真濟人叫是
講，培墓的時，身軀紮紅包會使擋歹運、鎮煞，其實毋免按呢，因為這个行為對祖先真無
禮貌，烏白擲閣會汙染環境。（新聞標題、導言及內文皆為台語文）
紅包橐仔予人烏白擲佇塗跤，毋但是路邊有，邊仔的樹仔跤嘛有。清明節得欲到矣，培墓
的人愈來愈濟，佇新竹大坪頂靈骨塔附近，最近出現大量予人烏白擲挕sak的紅包橐仔。
民眾：「對環境無好，規路攏是誠歹看啊！」
有人會講培墓的時，身軀愛紮貯鹽抑是米的紅包來避邪，欲走才共紅包擲掉，代表去歹運
的意思。毋過民俗專家講其實毋免按呢，毋但無法度避邪，閣對祖先無禮。
民俗專家 廖大乙：「無清氣嘛無禮貌的做法。因為一般民間（風俗），若是拄著煞氣，
除陰、除煞才會用鹽米；（培墓）是慎終追遠、敬老尊賢，所以非常禁忌紮鹽、米去靈骨
塔掃墓。若是需要鹽米掖淨，是轉去到厝進前，會當家己的身軀掖鹽、米，來除穢除淨的
意思。」
親像紅包橐仔佇塗跤滿四界，新竹市環保局表示，民眾烏白擲糞埽，掠著也會食罰單，罰
千二到六千箍。
新竹市環保局秘書 林玉焜：「清明祭祖掃墓期間，請維護環境清潔，避免亂擲糞埽、薰
屎。根據廢棄物清理法第二十七條第二款規定，違法者會罰1200─6000箍罰款。」
環保局表示，最近針對附近路段，除了會安排清潔隊加強摒掃以外，嘛會派人到現場加強
巡邏，也呼籲去培墓的民眾做伙維護環境的清氣。
記者 張君豪 新竹報導
唐嘉良/編輯