公視新聞網 https://news.pts.org.tw/article/723665
艋舺公園明年改建 店家驚街友四界走oh管理
發布時間：2024-11-11 19:15 更新時間：2024-11-12 08:54
呂尚儒 / 地方報導
許猛
https://www.youtube.com/watch?v=K0iknYnFf-M
臺北上捷看會著街友的所在，就是臺北車頭佮龍山寺附近的艋舺公園。毋過臺北市府拍算
咧明（2025）年，動工改建艋舺公園，施工愛2年的時間。真濟附近的居民佮店家，就煩
惱街友無地蹛，活動範圍會湠開，愈oh管理。民間團體就呼籲市政府，就近設小型的收容
空間。（新聞標題、導言及內文皆為臺語文）
臺北艋舺龍山寺，毋但是觀光行踏的所在，嘛是在地真重要的信仰中心，一寡行善團體、
抑是店家，會到附近的艋舺公園佈施食的物件予街友，煞也造成環境衛生佮社會觀感無好
的問題。為著欲促進觀光，臺北市府拍算明年欲改建公園，附近的店家、居民是真煩惱。
施工2年的期間，街友無所在過瞑，活動範圍會湠開、愈oh管理。
店家池小姐：「食物的問題，其實怹無用甲遐爾仔濟，逐家攏會感覺講遮分遐分，手提甲
足濟的，提甲足濟的時陣伊食袂完，伊可能就烏白擲，烏白擲就足濟鳥鼠仔。」
店家黃小姐：「這馬嘛有保安隊咧管理，所以其實佮以前比起來已經好真濟。可能閣來就
是衛生的問題，若是政府有相關的政策，（改建期間）會使共遮的街友，可能有其他所在
通安置。」
長期關注街友議題的無家者聯盟，11召開記者會。根據怹針對七十外位街友做的調查顯示
，咧改建期間，多數街友拍算欲搬徙到公園外圍的亭仔跤、萬華區街路佮公共空間，抑是
去臺北車頭，民團是建議市府就近設立小型的收容空間。
台灣芒草心慈善協會秘書長 李盈姿：「較大型的機構，以往逐家印象中可能會造成社區
衝擊，抑是伊會變成在地受棄嫌的設施，所以阮主張的是小型閣分散的。咧有穩定食蹛資
源支持的情況下，怹就較會使恢復體力，嘛有精神會使去做散工，甚至是接受正式的就業
轉換。」
臺北市社會局是回應講，怹有規畫多元安置方案，身體較無好的抑是失能的街友，會優先
安排怹去蹛長期照顧機構，嘛會繼續加強和民間團體的合作，增加安置資源的補助；針對
無願意接受安置的街友，改建期間會另外規畫街友囥行李的空間，嘛會比照覕寒、防災機
制提供臨時庇護。
唐嘉良/編輯