公視新聞網 https://news.pts.org.tw/article/700717
新冠疫情夯、臺南加64例 序大著緊注XBB疫苗
發布時間：2024-06-18 19:15 更新時間：2024-06-19 08:27
李晨宇 / 臺南報導
https://www.youtube.com/watch?v=EiWO096zjIM
疾管署宣佈新冠疫情進入流行期矣。台南頂禮拜就增加64例確診患者，成大醫生也指出這
兩禮拜有真濟人去穢著新冠肺炎，這陣的疫情上無愛兩個月才會降落來。因為65歲以上的
序大有九成猶未注疫苗，衛生局也是建議民眾緊去注XBB疫苗，降低重症的機率。（此則
新聞標題、導言、內文皆為臺語文。）
病院內底人滿滿滿，五日節連假結束煞真濟人無爽快去看醫生，最近新冠疫情閣開始滾絞
，成大病院的醫生講，這兩禮拜來看診的患者，確實有真濟人去穢著病毒。這陣已經無強
制掛喙罨，閣加上學生囡仔準備欲歇熱，國內外旅遊的人來來去去，恐驚會加速病毒傳染
的速度，台南頂禮拜就增加64例確診患者。
確診者黃小姐，「攏無法度食物件，就是聲音猶是像這馬按呢足梢聲，感覺有並頂一波確
診閣較辛苦的感覺。」
臺南市衛生局副局長林碧芬，「國內頂禮拜增加328例COVID-19確診病例，並頂禮拜263例
、增加64例，疫情閣進入流行期，對高危險族群存在威脅。」
目前臺灣主流的新冠病毒是JN.1，毋過美國當地新型的變異株KP.2 KP.3當咧湠，疾管署
監測資料顯示，JN.1有降低，顛倒是KP.2參KP.3比例沓沓仔提升，流行期估算愛八九月份
才會降會落來。注預防射會當提升咱人的保護力，毋過醫生指出，這陣有九成65歲以上的
序大猶原猶未注。
民眾，「事實上嘛是會驚穢著，但是我嘛是有固定時間去注。」
成大醫院感染科主治醫師羅景霳，「序大無想欲注欲預防射，是因為進前是注五支，但是
阮這馬注的叫XBB，伊是新的病毒，較早咧注的預防射，其實對這馬，JN.1這狀況預防效
果無好，應該攏愛建議這馬，愛去注XBB新的預防射。」
天氣連鞭寒、連鞭熱，病毒密度增加，衛生局呼籲高風險族群佮抵控力較無好的民眾，若
到人濟的所在猶是建議愛共喙罨掛好勢，降低感染風險。
洪家馨/編輯