公視新聞網 https://news.pts.org.tw/article/694327
網路收錢替人求姻緣？ 鹿耳門聖母廟：是詐騙
發布時間：2024-05-09 19:15 更新時間：2024-05-10 08:18
https://www.youtube.com/watch?v=c-PEJsx4oUI
李晨宇 / 採訪報導
近來有人佇網路頂，利用鹿耳門聖母廟月老公的名義，講會當替人求姻緣、斬桃花、賣法
寶等等，費用攏真懸。目前已經有五个人向聖母廟反映，廟方也出面強調，絕對無這款服
務，提醒民眾毋通予人騙去。
壁堵頂頭結婚相貼甲滿滿滿，正統鹿耳門聖母廟月老牽姻緣，名聲真迵，總是唌真濟人來
求紅線。不而過這馬佇網路頂煞有人用廟的名義，講會當開壇作法幫助人感情穩定佮斬桃
花。陸續傳出有民眾予人騙，甚至連國外的信眾嘛險仔予人拐錢。
受害者男朋友表示：「前一陣仔阮就定定咧冤家，伊(網路)看著這就去問，後來伊有共伊
講，予一个像祈福包的物件，欲共收一萬五千箍，我就共問所以敢是我去櫃台問就知影你
，伊講著無毋著，結果廟的講無這个人。」
受害者表示：「伊叫阮相片愛傳予伊，閣愛錢五千箍。」
民眾表示：「騙民眾我感覺按呢無好，若咧失志不如意的時陣，當然就會看著遮有通好求
，咱就來求看覓。」
網路社團的業者常在攏用，有法師佇廟內幫信徒辦事加持的騙術，才閣想辦法叫人買法寶
、收費用，金額對兩千到上萬箍攏有。實際到這間廟，廟內干焦點燈、求紅線爾，並無其
他的服務。毋過到今上無已經有五个人向廟方反映，有兩个人予騙錢，廟方出面掰會講，
這是詐騙集團咧變空。
正統鹿耳門聖母廟總幹事蔡瑞源表示：「阮是一个正信的宮廟，所以講阮無咧做法事的代
誌按呢，阮遮你若欲求月老求姻緣求好貴人緣，你攏愛親身來到阮聖母廟。」
臺南市警察局第三分局偵查隊長林威廷表示：「若民眾發現受騙請提供相關事證，本分局
將會依照法偵辦，嘛呼籲民眾會使同步利用面冊，佮相關社群軟體的檢舉功能。」
針對假月老咧騙錢，警方呼籲受害者出面報案，廟方也指出，有任何問題會當直接去廟抑
是敲電話做詢問，以防詐騙事件閣發生。
陳玟芯/編輯