公視新聞網 https://news.pts.org.tw/article/694143
菲律賓海面熱帶系統咧發展 有可能結做風颱
發布時間：2024-05-08 19:15 更新時間：2024-05-09 08:43
https://www.youtube.com/watch?v=0opXVA_dsdA
這禮拜濟雲好天，毋過目前佇咧菲律賓東南方，有一个熱帶系統當咧發展，氣象署表示，
有可能發展做風颱，會閣繼續觀察。這禮拜到後禮拜一，會有一陣鋒面接近，水氣會增加
。後禮拜二東北風來，時到東北部溫度會閣下降。（此則新聞標題、導言、內文皆為臺語
文。）
24節氣已經過立夏，這馬已經是5月矣，毋過猶無風颱形成，今年的頭一个風颱當時會來
？根據美國的電腦模擬預測，未來菲律賓東南方的熱帶系統有機會發展做風颱，甚至沓沓
仔徙對北爿來。咱氣象署是回應講，確實有發展做風颱的可能性，毋過目前的變動性猶閣
誠大，後禮拜敢會有風颱、猶真歹講。
中央氣象署預報員 黃恩鴻，「衛星雲圖頂看起來，佇菲律賓東南方海面，其實就是佇赤
道、這个規个低壓帶地區，是有較明顯的熱帶雲簇當咧發展，模式預報看起來，這个熱帶
系統的發展，預估也是到後禮拜二，甚至是後禮拜三以後，才會有較明顯的發展。」
也有民眾認為，攏已經5月矣，煞攏猶無風颱，氣象署表示，今年到今攏猶無風颱雖罔有
較罕見，毋過猶袂算傷晏。因為依照往過的例，西太平洋捌到7月才出現頭一个風颱。
中央氣象署預報員黃恩鴻，「預估來講其實五月，是有真濟佇西太平洋，可能就會有一寡
風颱的形成，影響臺灣的部份 可能平均猶是一个左右，上晏的時間點、猶是有佇七月，
才有頭一个風颱形成，以形成時間來看，這馬猶無風颱無算特別稀罕，毋過確實是較罕見
。」
氣象署表示，目前對咱較有影響的是，禮拜到下禮拜一會有一波鋒面，水氣增加，中部以
北和東部會有陣雨抑是雷公雨，南部也會有零星雨，鋒面通過了後，紲落去後禮拜二換受
著東北季風影響，溫度會小可仔降低。
熊楚瑜/編輯