公視新聞網 https://news.pts.org.tw/article/693781
壽山動物園救傷逐年有百外隻 以猴、鳥仔為主
發布時間：2024-05-07 11:51 更新時間：2024-05-07 13:47
鍾依憓 邱紹揚 / 高雄報導
https://www.youtube.com/watch?v=Z1gse0ra8lU
高雄壽山動物園的救傷中心逐年醫治百外隻野生動物，鳥仔類占上濟。最近動物園連紲救
著兩隻目睭著傷的暗光鳥的鳥仔囝，目前已經恢復健康矣，動物園嘛呼籲民眾，若是佇野
外看著鳥仔囝家己一隻踮遐，著愛敲1999通報，毋通烏白抾轉去飼。（此則新聞標題、導
言、內文皆為臺語文。）
兩蕊目睭圓閣大蕊，看鏡頭的模樣實在真古錐，這是暗光鳥的幼鳥仔，頂個月予農業局送
來壽山救傷中心，檢查了發現in目睭的角膜受傷，懷疑可能是予挵著，佳哉經過治療，目
前已經沓沓仔恢復，最近相紲有兩隻暗光鳥的幼鳥仔送來動物園，因為幼鳥仔閣袂曉飛、
袂揣物件食，愛等in學著野外生存的能力，才會當放散。
壽山動物園救傷中心獸醫 王念澄，「阮就是經過目睭的檢查了，阮這馬是共目睭暫時紩
起來 點目藥水，觀察暗光鳥目睭恢復的狀況，阮會囥一寡活的鳥鼠，予伊家己食，看敢
會當放散。」
壽山動物園救傷中心，逐年攏會醫治百外隻的野生動物，是以猴山仔、鳥仔猛禽為主，其
中鳥仔著傷的比例佔2/3，目前救傷中心內面有八隻受傷的暗公鳥，大多攏予挵著，嘛有
翼仔斷去、神經出問題等等狀況。
壽山動物園救傷中心獸醫助理 尤佳寧，「可能有時陣暗光鳥佇訓練飛行的時陣，幼鳥仔
落落去岫外口，毋過in的母親鳥就佇附近，若是共伊tshuā走，伊的學習能力行為會，當
然抑是由親鳥tshuā，對in的生存較有幫助。」
獸醫表示講，因為暗光鳥適應能力誠強，除了一般的樹林，嘛會出現佇都市綠地，生活環
境佮咱人有重疊，呼籲民眾若有看著幼鳥仔，千萬毋通抾轉去飼，抑是交予相關單位協助
治療。
洪家馨/編輯