公視新聞網 https://news.pts.org.tw/article/693782
新冠引起免疫負債 腸仔病毒病例10年來上濟
發布時間：2024-05-07 11:55 更新時間：2024-05-07 13:48
呂尚儒 莊浚佑 / 臺北報導
https://www.youtube.com/watch?v=g24QWsza2gk
根據疾管署的統計，今年腸仔病毒的病例數是10年來上濟的，這禮拜恐驚會超過1萬6千例
就醫人次，副署長指出這可能和前幾年新冠疫情防疫引起的免疫負債有關係。另外嘛有醫
生指出，除了胃腸的病例增加，目前咧門診的狀況，嘛有濟濟囡仔穢著流感、呼吸道病毒
等等，呼籲家長愛加注意囡仔的衛生習慣。（此則新聞標題、導言、內文皆為臺語文。）
預防腸仔病毒，上有效的方法之一就是教囡仔愛捷洗手。國內腸仔病毒疫情湠燒，疾管署
指出確診的個案是10年來上濟的，新北、臺中、臺南等地區，有濟濟學校停課，根據統計
趨勢來看，疫情猶咧繼續夯懸，預估會比頂禮拜萬3、閣加3千外例，這禮拜恐驚會超過1
萬6千个就醫人次。
疾管署副署長曾淑慧，「這嘛算是一種免疫負債，因為逐年攏會有一寡腸仔病毒的流行，
毋過因為過去兩三年來，因為逐家攏注意一寡手部衛生，抑是呼吸道禮數，所以相對來講
個案數就較少。」
疾管署解說講，今年腸仔病毒的病例會遮濟，其實嘛佮前幾年COVID-19嚴格防疫之下，所
引起的免疫負債有關係，預估6月會是腸仔病毒的高峰期。另外，嘛有醫生指出目前毋但
腸仔病毒愛注意，親像A型流感、B型流感、腺病毒、佮呼吸道融合病毒等等，最近佇門診
嘛攏定看著。
旭恩小兒科院長羅士軒，「目前來講因為最近較定看著，就是流感猶是一直攏有，這陣仔
拄好閣有一寡，吐佮落的囡仔變濟，若干焦是一般感冒遮的，阮建議至少愛退燒以後，像
腸仔病毒就是，一禮拜才會使轉去學校上課，猶若腸胃炎大概症狀改善，24到48點鐘內猶
是有傳染力。」
醫生呼籲家長、學校老師，愛提醒囡仔捷洗手、注意衛生的習慣，若是有發燒、落佮吐、
抑是人無精神等等的情形，著愛緊就醫予醫生做快篩，確定是啥物病症，對症落藥、避免
病情加重。
洪家馨/編輯