公視新聞網 https://news.pts.org.tw/article/693269
立委要求教育部 著共「閩南語」改做「臺灣台語」
發布時間：2024-05-02 19:15 更新時間：2024-05-03 08:21
呂尚儒 莊浚佑 臺北報導
https://www.youtube.com/watch?v=3iqZ5-TBecQ
最近針對教育部長期以來，共台語叫做閩南語，這款無尊重台語族群主體性的稱呼，佇咧
網路頂頭吵甲熱怫怫。關注台語議題的民進黨立委陳培瑜和張雅琳，今仔日佇立法院質詢
的時，嘛要求教育部愛積極改正，共閩南語改叫做臺灣台語，教育部表示，若是和課綱無
關係的業務，親像語言檢定、語文競賽、文學獎等等，會佇一個月內討論出結果，看欲按
怎調整。
無論是教育部的面冊文章、線頂辭典抑是全國語文競賽等等，只要佮台語有關，教育部攏
猶是用「閩南語」來稱呼。毋但引起民間團體的不滿，臺師大學者嘛有寫陳情書，呼籲教
育部改做「臺灣台語」，毋過教育部的回應是講無社會共識，課綱暫時無法度振動做理由
毋改。關注台語議題的民進黨立委張雅琳，佇拜四(5/2)立法院質詢的時，就針對118新課
綱，問教育部敢會願意往「臺灣台語」的方向調整。
立委張雅琳表示，文化部拍算佇咧今年6月至10月中間，欲召開「國家語言發展論壇會議
」，會針對台語的名稱來討論，教育部答應講會共這个會議的結論，囥入去118新課綱的
討論。另外，毋是課綱業務範圍的部份，親像語言檢定、語文競賽遮的，立委陳培瑜嘛要
求教育部，趕緊改做尊重語族主體性的「臺灣台語」。
教育部政務次長劉孟奇答應講會佇1個月內，共課綱以外的業務整理出來，研究講欲按怎
改。立委表示教育部的回應猶真保守，紲來520欲上任的新教育部長，敢會願意積極回應
台語族群久年來的向望，正名做臺灣台語，逐家攏咧金金相。
張曼亭/編輯