公視新聞網 https://news.pts.org.tw/article/692873
「台語」名稱引爭議 台師大學者呼籲政府統一
發布時間：2024-04-30 19:15 更新時間：2024-04-30 19:47
呂尚儒 莊浚佑 / 臺北報導
https://www.youtube.com/watch?v=1VL_evgIMxY
你是共叫做台語、台灣話、河洛話、或者是閩南語咧？事實上文化部佇2022年的國家語言
發展報告指出，有7成外的民眾是使用「台語」這个稱呼，行政院也捌發公文，要求各部
會就愛統一叫做「臺灣台語」。毋過有學者指出教育部猶咧用「閩南語」，甚至閣予中國
學者提來起無空，要求咱的語言名稱袂當叫「台語」，台師大的學者就做伙寫陳情書，要
求政府愛統一台語的名稱，堅定維護台語的主體性。（此則新聞標題、導言、內文皆為臺
語文。）
針對「台語」這个語言的名稱，佇臺灣一直攏有無仝款的討論，有人主張愛叫台語、有人
主張閩南語、嘛有人講是河洛話，咱嘛來聽民眾的實際看法。
民眾 黃小姐
(台語閣換一个名你會感覺怪怪無)
會喔 會 我會感覺無習慣
民眾 涂先生
感覺是對這塊土地的感情按呢
是有人咧辯論講
是愛講閩南語抑是講台語
猶毋過我家己是較佮意講
我的母語是台語按呢
事實上這个討論，嘛對臺灣吵到法國。臺灣有一位咧法國開台語課的劉展岳老師分享講，
今年四月，學校內底有設一堵語言壁，「台語」也出現佇內底，猶毋過伊講教學五年來，
定會受著中國學者的質疑和挑戰，講「台語」為啥物毋叫「閩南語」。
法國國立東方語言佮文化學院教授 劉展岳
一部份欲用閩南語的人
伊就會想講你佇咧臺灣
恁教育部嘛是用這个詞
為啥物你無愛用這个詞
所以其實對阮來講
佇外口咧教咱臺灣語言的人
教咱歷史的人 文化的人
其實我足希望講咱臺灣會當
有一个較清楚的選擇
劉展岳認為用台語的名，毋但是咱的認同，嘛有標示咱臺灣主體性的意義。若根據2022年
國家語言報告的調查來看，有7成外的民眾是使用台語這个名，後續行政院嘛捌發公文要
求各部會，應當優先使用「臺灣台語」，毋過教育部到今煞猶咧用「閩南語」。臺師大臺
文系的教授共同寫陳情書，希望政府以「臺灣台語」來稱呼，結果教育部猶是消極回應講
無社會共識，予in感覺真失望。
臺灣師範大學台文系主任 許慧如
中文來臺灣進前
台語這个語言是臺灣80%
左右的人的母語
其他20%嘛大部份會曉講這个語言
因為台語就是共同語的角色
就是無仝語言的人之間溝通的語言
這个語言伊就是號做台語抑是臺灣話
但是這馬咱煞因為
這个政治的考慮
佇咧咱臺灣去予臺灣家己的人
要求咱袂當叫家己的名
這个問題我感覺
比咱咧國際袂當叫臺灣閣較嚴重
臺師大臺文系的系主任強調，台語的叫法佇臺灣早就已經有社會共識，甚至閣有文化部的
調查報告做證明，呼籲教育部莫閣目睭瞌瞌，當做無看著，嘛希望閣來118年的新課綱做
一回改起來，予國家語言發展的推動有一致性。
洪家馨/編輯