公視新聞網 https://news.pts.org.tw/article/690848
台文劇本冊像「金紙」 阮劇團創意設計唌人目
發布時間：2024-04-17 19:15 更新時間：2024-04-18 08:26
https://www.youtube.com/watch?v=vt1jJPfRzZg
看起來親像是金紙的冊，民眾敢有看過？這馬有劇團，用in三齣、誠出名的舞台劇，出
版做劇本冊，閣共伊設計若、拜拜咧用的金紙、佮90年代雜誌的模樣，這款充滿台灣味的
設計，隨唌讀者的注意。
黃色的紙，閣有紅色大印，予人叫是一疊金紙。這是嘉義的阮劇團，用in三齣台語舞台劇
，出版的台文劇本冊。劇本冊市草無好、台文冊市場也較細，落尾in決定用台灣人會感覺
「親切」的設計唌人目。
阮劇團藝術總監汪兆謙講:「譬如講表演藝術，抑是台文、抑是出版。這馬攏是面對挑戰
真大的，無仝的行業，所以我就參小子(設計師)咧討論講，這本冊我希望伊看起來，莫親
像是冊，但是我愛予觀眾朋友一看，第一眼伊就感覺，這佮我有關係。」設計師廖小子講
:「自早到這馬，金紙有分足濟形式的，有這種環保的金紙，這種足傳統的，嘛有這種算
做是發財金。」
提出幾若疊金紙，因為真正的金紙、紙質無適合印刷，設計師參考各款金紙，研究材質特
性，才順利呈現出「金紙」形象的冊。
設計師廖小子講:「紙質欲按怎予人好反面，按怎好掀，猶毋過嘛好讀，另外一方面嘛愛
予伊有金紙的感覺。」
這款台味設計，是設計師廖小子的專長。台灣信仰燒金、色水顯目的雜誌、市場刺目的走
馬燈，過去予人感覺無好看的物件，攏是伊創作的元素。廖小子對10冬前開始做台文創作
，也發見各界對推台語文攏真拍拚，今馬的台語文創作環境也愈來愈好。
張曼亭/編輯