公視新聞網 https://news.pts.org.tw/article/690453
高雄鹽埕埔文武聖殿宣講百年 登錄做無形文資
發布時間：2024-04-15 19:15 更新時間：2024-04-15 19:40
https://www.youtube.com/watch?v=prjiUO0ZB9E
高雄市鹽埕埔的文武聖殿聖諭宣講，到今已經有上百年歷史，主要是苦勸世間人愛善良，
宣導經典的義理、做人的道理等等，是過去安定社會的力量。這項流傳百年的聖諭宣講，
今年予高雄市登錄做無形文化資產。
佇高雄文武聖殿，有幾若位穿白色長衫的宣講生，向關帝祖磕頭，頭前的主講開始宣講的
內容，文武聖殿逐年的聖諭宣講舊曆三月初六這工開始，今年除了是一百年，上特別的是
予高雄市登錄做民俗無形文化資產。廟方表示，宣講主要是苦勸世間人愛有倫理道德，閣
有因果報應等內容。
高雄文武聖殿勸善聖諭宣講部宣講生劉崑誠講:「阮的宣講生任務就是講，這个鸞冊所記
載遮的詩、詞內容，講做白話。」高雄文武聖殿勸善聖諭宣講部主講陳麗貞講:「做人愛
善良，阮就是咧勸人善良，所以這个無形文化，也是一个勸人善良按呢。」
聖諭宣講是對明清時代就有的制度，過去因為有戰爭，天災等因素，為著安定民心，民國
14年就成立勸善社，宣講通常攏佇廟埕來進行，彼當時宣講是誠重視社會教育，主講會徛
佇中央，邊仔有兩位副主講，予過去無法度讀冊的百姓、會當透過宣講得著智識。
高雄市立歷史博物館館長李文環講:「這是高雄市第一个，也是應該是全國第一个的聖諭
宣講，登錄做無形文化資產一个重要的案例。」
廟方表示，文武聖殿的聖諭宣講是全台唯一，真濟宣講生也傳承第三代，每年的舊曆三月
初六到十月二十是宣講的期間，今年受著關帝祖指示，干焦佇文武聖殿進行宣講儀式，已
經成做是廟寺重要的特色。
張曼亭/編輯