公視新聞網 https://news.pts.org.tw/article/690095
第九屆"母語文學獎" 鼓勵用台.客文來說土地
發布時間：2024-04-12 19:15 更新時間：2024-04-12 19:59
https://www.youtube.com/watch?v=YKzDVLmm_j0
喙講爸母話、手寫台語文。教育部舉辦的「母語文學獎」，對97年開始舉辦，今年已經是
第九屆，鼓勵民眾用母語來創作，記錄這塊土地的點點滴滴。(本則新聞標題、導言、內
文皆為臺語文)
唸歌團唱出對文化流失的煩惱，為著予咱在地的語言湠落去，今年是教育部第九屆的「母
語文學獎」，鼓勵逐家用台文、客文來創作。這屆總共397件作品報名，有學生、老師和
社會人士來參加，上尾揀54件著獎。今年以《紅跤蹄的故鄉》佮《擉算》提著雙料冠軍的
蔡秀英，40歲才踏入台語文學界，拚勢學台文，就是想欲予查某囝綴咧學會曉講台語。
台語現代詩散文社會組第一名 蔡秀英：「我上大的創作理念就是寫好我欲予查某囝讀有
嘛，我的手寫我的喙，你講你的母語是啥，你就寫啥」
承辦單位表示，大概有四分一到三分一對母語創作誠有熱情的作家，逐冬攏有新作品，逐
冬嘛攏有一寡新人。對文學蓋有興趣的大學生張逢恩，今年頭一改報名就著等，伊表示，
未來也想欲用台語文記錄故鄉的故事。
台語散文學生組第三名 張逢恩：「寫彼寡故鄉的代誌，因為我感覺佮(我的)故鄉有關係
的，攏是佮台語較有關係的，(想欲)用台語這个連結，來連結我的故鄉」
承辦單位望未來會當有閣較濟有志投入，用咱的母語去記錄對這片土地的感情。
張曼亭/編輯