公視新聞網 https://news.pts.org.tw/article/689913
仝電柱4個月內予鳥仔做41擺岫 台電加強巡查
發布時間：2024-04-11 19:15 更新時間：2024-04-11 19:45
https://www.youtube.com/watch?v=aaFHelO3f_0
高雄這幾年發生真濟擺，電火柱頂的鳥仔岫，造成相拍電、失電的意外，台電人員佇春天
鳥仔生湠的季節，攏會加強巡邏、清除鳥仔岫。佇高雄彌陀，就有相連紲佇仝一枝電火柱
一直做岫，台電人員這四個月，就清掉41改。
台電人員裝備穿好勢，徛佇作業車頂懸，用棍仔共電火柱仔的物件拍落來，拍落來的
就是鳥仔岫，最近in誠無閒，尤其佇彌陀區這支電火柱仔，一對客鳥翁仔某，上愛佇遮做
岫，台電人員四個月內已經清除41擺，台電高雄區表示講，永安、彌陀等等的沿海地區，
因為生態豐富，鳥仔佇電火柱仔做岫的狀況加較濟。
台電高雄區處路巡課課長，吳品志表示：「年底12月到隔轉冬的三月至四月左右，這段時
間就是鳥仔咧湠種的時間，所以定定揣咱柱仔頂，較平穩的所在去做岫。」
每年的12月到三月攏是鳥仔生湠季節，根據台電高雄區統計，舊年有19擺的失電，攏是鳥
仔岫造成，因為岫內面若是有鐵線，佮電火柱仔的導體磕著，就會相拍電，工程人員咧作
業時嘛會有危險。
台電高雄區處高級外線技術員，黃振峰表示：「會誤著電線佮頂懸彼種鐵仔，就會有電弧
，電弧有當時仔足大，有當時仔足小無一定，所以就是驚電弧去傷著人。」
台電高雄處表示講，對舊年12月到三月，攏總清除914擺的鳥仔岫，數量比過去閣較濟，
今年是加強巡邏，透早、下晡攏會巡一擺，目前佇電火柱仔頂懸嘛有設這款趕鳥仔的物件
，向望鳥仔去安全的所在生湠，嘛會當減少跳電、失電的事故。
陳怡臻/編輯