公視新聞網 https://news.pts.org.tw/article/687669
4月開始電錢起價 家長驚學校省錢.毋開冷氣
發布時間：2024-03-28 19:15 更新時間：2024-03-28 20:04
https://www.youtube.com/watch?v=epsK75E4N_k
四月開始，電錢就欲起矣，中南部本底就誠燒熱，就有學生家長煩惱講，未來學校敢會為
著省電，較無愛冷氣。是因為學校冷氣電錢由教育部補助，用偌濟電、用電時間攏有標準
。目前經濟部是決議，學校的電錢這擺袂起價。(本則新聞標題、導言皆為台語文)
學生囡仔當咧教室上課，最近高雄天氣漸漸的轉熱，這間國小有的班級是開始吹冷氣矣，
這陣中南部已經有縣市氣溫超過三十度，有家長會煩惱，南部天氣本底就燒熱，若是四月
電錢起價，學校敢會為著省錢，無欲開冷氣，驚囡仔會熱著，也有家長有無仝看法。
家長：「我感覺囡仔嘛莫過了傷四序，因為若傷四序，到時陣伊顛倒袂慣勢」
家長：「若講熱天欲到矣 ，氣溫懸，囡仔較會坐袂牢，抑是講囡仔的體質有的袂堪得，
所以會影響著囡仔的學習」
教育部對111年推動班班有冷氣，補助學校四個月的冷氣錢佮維護費，對今年開始補助金
額提懸到一度3.71箍，高雄市政府教育局對前年開始，補助日子特別增加到五個月，以高
雄前金國小為例，學校會以氣溫做標準，鼓勵老師超過28度才開冷氣。
高雄市前金國小老師 王文賢：「學校共遮的錢分配予各班來使用，咱有一張卡，學校會
共錢儉佇內底，各班就用遮的錢來吹冷氣」
高雄市政府教育局國中教育科科長 鄭義勳：「經濟部電價費率審議會決議，這改學校是
佇電價無調整的範圍之內」
經濟部已經決議，雖罔4月份電錢就會起價，毋過對幼稚園到大專院校，攏無欲起價，高
雄市教育局表示講，未來若是學校補助電錢有無夠的狀況，會當向教育局申請。
張曼亭/編輯