公視新聞網 https://news.pts.org.tw/article/687282
左營中山堂改做劇場啟用 招16歌仔戲團演出
發布時間：2024-03-26 19:15 更新時間：2024-03-27 08:26
鍾依憓 吳志鴻 / 高雄報導
https://www.youtube.com/watch?v=gEFX-G0x-Lo
往過是海軍藝文中心的高雄左營中山堂，也是高雄市歷史建築，這馬由國立傳統藝術中心
共整建做中山堂劇場，今年特別推出歌仔戲內台大捙拚，邀請全臺16團歌仔戲團來演出，
對四月演到八月，邀請南部鄉親做伙來看戲，感受無仝款的中山堂。（此則新聞標題、導
言、內文皆為臺語文。）
李靜芳歌仔戲劇團，佇台頂演出警察逐廖添丁的故事，紲落來猶有其他劇團，演出林投姐
仔等等無仝的故事，國立傳藝中心這擺推出歌仔戲內台大捙拚，邀請全臺16團歌仔戲團，
四月欲佇高雄中山堂演出，這也是中山堂重新修復了，頭一擺展演，由歌仔戲拍頭陣。
國立傳統藝術中心副主任陳修程，「歌仔戲是咱臺灣最本土原生的劇祖，所以講文化部非
常重視歌仔戲這塊，所以未來咱佇遮，就是欲做傳統戲劇的培育基地，咱先以歌仔戲拍頭
陣。」
左營中山堂過去是海軍藝文空間，也是戰後，高雄營業上久的電影院，這馬成做高雄市歷
史建築，經過五六冬，今年總算修復完成。這擺的歌仔戲內台大捙拚對四月開始，每禮拜
假日，16團歌仔戲團，連紲欲演出32場，唐美雲老師講，這改青年團演出，是將共臺北展
演的戲劇，全部徙來高雄，予南部鄉親也通欣賞。
唐美雲歌仔戲劇青年團團長唐美雲，「阮這改青年團，IN特別為著這改開幕，帶來經典好
戲《曲判記》，也希望共臺北佇戲劇院，演出的規格佮幼路的好戲，紮來高雄，予咱高
雄的鄉親看。」
左營中山堂重新整修了後，這馬是成做中山堂劇場，國立傳藝中心表示，未來除了戲劇演
出，也會培育傳統戲劇人才，向望成做南臺灣傳統藝術的培育基地。
洪家馨/編輯