公視新聞網 https://news.pts.org.tw/article/686560
輕鐵上落車愛鑢卡 悠遊.一卡通鎖卡機制無仝
發布時間：2024-03-21 19:15 更新時間：2024-03-21 20:02
https://www.youtube.com/watch?v=ZzVe_c2l6FQ
高雄輕鐵頭佮尾已經接起來，民眾出門攏真捷坐輕鐵囉。毋過最近有民眾反應，若是提悠
遊卡、一卡通去坐，一定愛鑢卡，特別是悠遊卡，若是無鑢，卡片會鎖起來，後回若是趕
時間，就誠無方便囉。
高雄輕鐵營運收費欲滿月囉，上下車攏愛佇月台鑢卡收費，若是袂記得鑢卡，票卡就會予
鎖牢，鎖牢的票卡，敢會當坐其他的交通工具咧，有民眾就發現講，提悠遊卡坐輕鐵無細
膩予鎖卡，煞袂當坐火車佮高雄捷運，若是一卡通就會使，實際問民眾，逐家攏無知影兩
張卡若是予鎖卡了後的差別，認為應該愛加宣導。
民眾講:「一卡通按呢比悠遊卡閣較好，我是感覺按呢。」、「若是悠遊卡予鎖卡，其他
攏袂當坐，若是一卡通攏是予鎖卡，閣會當坐捷運會較方便，無定著會當結合做伙，會當
宣導抑是貼一寡公告，共民眾講欲按怎處理遮的方法。」
目前悠遊卡佮一卡通，總共已經發出兩億外張，一卡通公司表示，因為兩間公司設計本底
就無仝款，若是一卡通予鎖卡，提卡去坐高雄捷運佮臺鐵是無影響，毋過若是悠遊卡，干
焦會當坐台北捷運爾，而且民眾愛去輕鐵站解卡，才會當繼續使用。
一卡通票證股份有限公司協理徐毓鍾講:「毋管是高雄輕鐵高雄捷運抑是臺鐵，其實攏是
阮配合的特約機構，毋管是佇營運規則抑是合約，抑是交易的一寡資安，阮其實攏是對應
主管機關這爿合法合規，進行相關的流程設計，其實佇每一个運距抑是服務通路，攏有對
立的獨立系統獨立運作。」
高捷公司提醒，若是民眾坐輕鐵，卡予鎖牢，閣去輕鐵站鑢一擺，高捷公司也佇六个捷運
站設置輕鐵解卡的機器，方便民眾使用。
張曼亭/編輯