公視新聞網 https://news.pts.org.tw/article/685715
芬園縣庄福德宮廟慶 邀請82棚布袋戲團謝神
發布時間：2024-03-16 19:15 更新時間：2024-03-16 19:42
楊舒晴 / 彰化報導
https://www.youtube.com/watch?v=AuEtMH0gP0A
彰化縣芬園鄉的福德宮，為著廟慶，三年前開始邀請布袋戲團，搬戲、謝神，想袂到戲班
的數量逐年增加，今年創下紀錄，計共邀請82棚的布袋戲團做伙演出，有袂少民眾到場鬥
鬧熱。(這則新聞標題、前言、內文為臺語文。)
鬧熱的布袋戲表演，詳細共看，戲棚排甲躼躼長，強欲佔滿規个車路，芬園的縣庄村福德
宮，舉辦27周年的廟慶活動，邀請82棚的布袋戲班來謝神，特別的仙拚仙場面，唌袂少民
眾來看鬧熱。
民眾講：「土城來的，我綴遊覽車來的，頭一改看遮爾仔濟布袋戲，足壯觀，覺得真新奇
。」
另外一位民眾也講：「這馬布袋戲這个物件是愈來愈少矣，真罕咧有這个機會，有遐爾濟
場，我感覺講，人愛來支持捀場一下按呢。」
芬園縣庄福德宮表示，逐年攏會佇三月中左右，聯合舉辦宮慶佮頭牙活動，三年前信
徒捐獻66棚的布袋戲謝神，這陣戲班的數量，一年比一年濟，嘛成做地方信仰的特色
縣庄福德宮主委郭哲榮講：「三年前，每一改的頭牙逐家攏謝，謝差不多六十幾棚啦，六
十幾棚攏一工一工做，去吵著厝邊仔啦，了後我才一个想法講，無六十幾棚做一改做按呢
，才有延伸這馬的八十棚按呢。」
廟方表示，縣庄福德宮是地方重要的信仰中心，嘛是因為有信徒的捐獻，才有戲班大車拚
畫面，除了欲答謝伯公仔的庇佑，嘛希望透過活動，予廟口看戲的文化會當繼續傳落去。
張曼亭/編輯