公視新聞網 https://news.pts.org.tw/article/683194
臺南百年「擔餅節」 爸母擔餅、款囡仔衫謝神恩
發布時間：2024-02-29 19:15 更新時間：2024-03-01 08:28
李晨宇 / 採訪報導
https://www.youtube.com/watch?v=npoidNH_IvM
臺南永康廣興宮，傳承百年的「擔餅」，也是地方重要的民俗活動。只要舊年厝內面有嬰
仔出世。厝內的人就會擔水餅、款囡仔的衫仔褲，來廟裡叩謝神明。今年攏總有19戶來答
謝，嘛共這寡餅送予逐家，食平安、添歲壽。
囡仔的爸母一大早擔餅頭、兼攢一套囡仔全新的衫仔、褲、鞋仔來感謝眾神保庇。臺南永
康廣興宮每冬舊曆正月20辦擔水餅活動。相傳過去村民為著欲祈求厝內會當添丁，逐家相
招來向眾神下願，落尾才閣倩戲謝神兼擔餅分送。廟方講，這陣來參加擔餅的，攏是舊年
厝內有紅嬰仔的家庭，嘛閣分送予有參加福份的民眾佮耆老食平安添歲壽。
參與居民講:「來擔餅後生生孫仔，囡仔歡喜心來分享，逐家老歲仔人食一下甜甜。」、
「阮翁的老厝佇遮，所以百年傳統逐家攏會參加，阮第一胎嘛有來，希望會當祈求囡仔平
安健康大漢。」勢廣興宮董事長林進旺講:「福份餅就是你有參加福份就有這个餅，另外
老大餅就是，恁兜若有六十歲以上的查埔人，就有這份餅按呢。」
今年計總有19戶抱囡仔來廟埕擔餅分享喜氣，廟方嘛準備平安七星橋予逐家通元神光彩、
平安順序。另外有臺語老師家己寫詞譜曲，來紹介擔餅的文化。董峰政老師認為，用旋律
傳唱是傳承上蓋緊的方式，現場嘛唌濟濟人來體驗唸臺語詩的心適。
民眾講:「第一改唸擔餅的唸謠，我閣唸了足順，唸了的時陣閣賞我。」台語老師董峰政
講:「共我細漢的記持一首一首共寫落來，我寫我頭前這个許縣溪，這叫做臺南母親之河
，過來我想答謝爸母，所以我有寫爸母恩，阮是攏用歌謠來咧傳湠啊，攏台語詩。」
擔餅文化有上百冬歷史，已經予人列做市定民俗。往過擔水餅干焦開放予男性參加，毋過
這馬社會已經是男女平權，閣加少囝化真嚴重，所以毋管是查埔查埔攏會當參加。
張曼亭/編輯