公視新聞網 https://news.pts.org.tw/article/679618
年貨四秀仔百百款 寸棗是啥？米荖麻荖相仝？
發布時間：2024-02-03 19:15 更新時間：2024-02-03 19:48
https://www.youtube.com/watch?v=6NW3pwdrUac
過年時仔，囡仔上歡喜的、就是通食著各款四秀仔。有一寡四秀仔，各位觀眾朋友可能對
細漢食到大漢，煞無一定知影in台語是號做啥物名。這嘛咱綴鏡頭、到年貨大街，看這寡
四秀仔用臺語按怎唸。(這則新聞標題、前言、內文為臺語文。)
民眾攏趁好天氣出來辦年貨，過年時仔咱會食真濟四秀仔，毋過遮的四秀仔台語按怎唸，
民眾敢知影？
記者實際街訪民眾，麻荖、米荖民眾攏較知影，咱換另一款四秀仔（寸棗），繼續問民眾
看覓。
民眾表示：「我連伊華語是啥我攏毋知，毋知，無看過。」
「啥物，啥物酥？敢若無看過呢？有啦有看過 袂曉唸。」
「這我袂曉講。」
「豆棗喔？」
逐家過年時仔捷食的四秀仔，除了這款糋過、包麻仔、抑是米的麻荖、米荖以外；第二款
捷看著的，就是這款號做寸棗的食物；閣有這款內底是塗豆、外層包粉紅仔色、白色糖的
「生仁」；落尾閣有這種用糕仔粉做的、通變做各款造型的糕仔。另外四秀仔按怎號名，
也有趣味的故事。
臺語顧問蘇世雄表示：「彼个叫做寸棗。我咧想可能，和彼个長度差不多一寸，彼个大概
有關係。有的講米荖、抑是講麻荖，荖我咧想是毋是老大人疼囡仔，攏共囡仔當做寶貝，
我這个ló，毋過這是抄字頭的啦，通常這个ló有一點感覺講，足寶貝的、足疼惜的彼款
感覺。」
蘇世雄講，平常時序大踮厝的時、就要和囡仔講台語，過年囝孫序小轉來團圓，對四秀仔
開始教怹台語，用台語學講好聽話，予台語在生活中自然使用，台語和台灣文化才有法度
代代傳。
張曼亭/編輯