公視新聞網 https://news.pts.org.tw/article/675102
嘉義獨立冊店用台語 tshuā民眾認捌樹木園歷史
林緯廷／嘉義報導
發布時間：2024-01-07 19:15 更新時間：2024-01-08 08:44
https://www.youtube.com/watch?v=868iFjCq2NU
1908年成立的嘉義樹木園，面積有8.6公頃，日本時代是咧生產栽仔的，內底有誠濟熱帶
性經濟作物，袂少在地人攏會去遐運動，嘉義獨立冊店，佇遐舉辦台語走讀， tshuā逐
家認捌內底植物佮日本時代留落來的建築。（此則新聞標題、導言、內文皆為臺語文。）
細粒仔的種子落佇塗跤，煞親像佮石頭落落來的聲仝款，老師紹介這種號做石栗的植物，
予第一改知影的人攏感覺誠心適。嘉義市的獨立冊店，佇嘉義市樹木園舉辦台語走讀，毋
但導覽內底的植物，嘛紹介遮的歷史建築。
植物導覽老師江季翰講，「日本時代就種，蓋濟樹仔包括這个，巴西的樹奶樹，這嘛咱臺
灣遮，唯一有規大片的樹林，遮有 百年的樹奶樹猶閣有，像咱這个肯氏南洋杉的母樹。
」
參加民眾黃小姐表示，「熟似足濟前進可能看過，但是毋知影in的名的植物，閣有看著in
的種子，我感覺足歡喜。」
參加民眾講，「若來遮運動攏干焦行過爾爾，這馬聽老師講講咧，嘛加減了解按呢。」
這個樹木園佇日本時代，是大葉松栽仔生產佮試驗的所在，所以樹木園內底閣有一寡當初
時的建築，有宿舍、水錶室、地下指揮基地等等的建築，導覽的老師就tshuā逐家透過遮
的建築，來認捌彼當陣的歷史。
歷史文化建築作家家永實講，「建築物咱有無仝款的認捌，予這个物件會當多元來看這个
樹木園，毋是干焦植物，閣有伊的歷史面。」
參加民眾陳先生表示，「家己來就毋知影講，這歷史是按怎，按怎來發生的，但是有老師
按呢講，阮才會使，有親身感受的感覺。」
佔地8.6公頃的嘉義市樹木園，對日本時代到今，內底已經有百外種的植物，是嘉義人平
常時就會來運動的所在，獨立冊店舉辦台語的導覽，希望透過自然佮歷史的角度，予民眾
透過母語認捌在地的歷史。
熊楚瑜/編輯