我台北市大安區出世大漢的
我反對廢死
其實以早我贊成廢死
彼當陣看著書寫講自從有死刑以來
猶是有殺人放火的代誌
而且夆判死刑的其實是政治犯上濟
尤其若誤判
就算講事後發現
人死嘛救袂轉來矣
所以我本來是支持廢死
這陣閣較老矣
想法改變矣
第一
因為台灣這馬無閣判死刑
所以我發現著
一寡人會因為按呢變甲敢做歹誌
尤其竟然有人夆掠矣閣喝「反正不會判死刑」
結果誠實無判死
這表示講
因為過去有死刑 而且會執行
所以殺人放火的代誌才無遐濟
可見死刑是必要的
閣來
若驚誤判所以欲廢死
會使
要有無假釋的無期徒刑來做配套才會用得
結果我干焦看著彼寡人咧喝廢死
無人講著無假釋的無期徒刑
按呢哪會使廢死？
最後
政治犯的問題
簡單
政治罪莫去設計有死刑就好矣
我愈來愈感覺講
若一方面欲廢死
閣無贊成無假釋的無期徒刑
這款廢死主張就佮講幹話已經差不多矣