公視新聞網 https://news.pts.org.tw/article/674762
臺南「聽障行車友善貼紙」提醒用爍燈代替喇叭
李晨宇 / 臺南採訪報導
發布時間：2024-01-04 19:15 更新時間：2024-01-05 08:39
https://www.youtube.com/watch?v=sEg4tAeCH0c
聽障者佇社會當中，因為無聽覺，誠無方便，也比較較危險。臺南市社會局特別製作「聽
覺障礙者行車友善貼紙」，欲提供予聽障者、通貼佇汽機車頂懸，除了提醒民眾會當加寡
注意，社會局建議、也會當用爍燈的方式來代替揤喇叭。（此則新聞標題、導言、內文皆
為臺語文。）
駛車對一般的人來講可能真簡單，毋過對聽障朋友來講，就愛克服聽覺損害蹛來的無利便
。臺南市聽障體育運動協會講，in駛車出去定因為無聽著汽車的喇叭聲，致使受著無蓋友
善的對待。臺南市社會局為著改善按呢的情形，結合交通局印「聽覺障礙者行車友善貼紙
」，藉此除了提醒用路人愛加一份注意，社會局嘛建議逐家會當用爍燈的方式代替喇叭聲
。
臺南市聽障體育運動協會常務理事陳治年表示，「我咧駛車攏無聽著毋知影停佇咧遐，真
濟人攏讓路矣，足濟人攏咧看我因為車咧爍燈，而且一直叭叭叭阮攏聽袂著，逐家一直看
我感覺我足奇怪。」
手語翻譯員梁瑪利講，「予咱的民眾知影講，這車就是阮聽障咧駛，會使佇較友善的社會
裡面駛車。」
根據了解，臺南到今領有身心障礙證明的攏總九萬偌人，其中聽覺障礙者佔1萬322个。依
照交通部的規定，聽覺障礙者猶是會使考汽機車的駕照。只是雄雄若有緊急狀況，in無聽
著聲音，無法度馬上閃予人過。這改社會局in參考日本的做法，做貼紙發放予聽障的朋友
，予in通貼踮汽機車頂懸，藉此降低in咧駛車的困擾。
臺南市社會局身心障礙福利科科長講洪筱涵，「希望用這个圖來標示，聽覺障礙的民眾咧
駛車，佇這个部分，因為聽障者in其實足歹注意著，像較捷看的消防車、救護車，閣有警
察車的警鳴聲，所以阮佇遮就用一个爍燈的提醒動作。」
行車友善貼紙目前除了會使去市政府申請，另外各區公所嘛有提供申請的服務。社會局講
，向望眾人會使將心比心，友善對待聽障朋友。
洪家馨/編輯