毋著
代誌無遮爾簡單
利息影響的毋是厝價爾
央行的任務嘛毋是咧打房
若升息仝款有其他對老百姓不利的影響
到時陣閣有其他問題會走出來
無一定較好過
其實
閣咧想講「我一定愛買厝」
這个觀念就毋著矣
顛倒會愈來愈凄慘
我共你講為啥物
歐洲人 日本人
敢會親像台灣人按呢痟買厝？
袂
怹真濟人攏一世人稅厝
按呢是按怎台灣人遮愛買厝？
第一
古早觀念猶袂改
以前厝價無這馬遮貴
一直稅厝不如儉儉下直接買厝
按呢較省麻煩
而且這幾十年來看別人當初買厝的
這陣攏起矣
就會共買厝當做投資矣
毋是干焦欲家己蹛矣
簡單講
除了建商
「老百姓家己的觀念」嘛是厝價一直起的原因
第二
台灣發展無平均
是按怎你想欲蹛雙北市？
因為頭路較好揣
有捷運、有真濟好的病院
有足濟活動攏佇遮舉辦
所以雙北市厝價哪有可能袂起？
需求大過供應
干焦這點厝價就一定會起矣
這就是過去台灣發展無平均造成的
若台灣自南到北攏真發展
啥人需要專工來雙北市蹛？
針對第一點
其實袂使閣用「我一定愛買厝」來想矣
這陣厝價遮懸
按怎打房嘛袂差偌濟
無可能對一坪一百萬隨變做五十萬
彼是無可能的代誌
簡單講就是：
「買袂起的人袂因為打房就買會起」
按呢欲按怎？
稅厝
想辦法叫彼寡投資囤房的人
共厝提出來稅
若會當共彼寡厝攏逼出來
供應增加
逐家一世人干焦稅厝嘛會當生活矣
免驚無厝通稅
欲按怎共厝逼出來？
囤房稅
這就是上實在的政策
會當共投資客佮建商的厝攏逼出來
免驚講囤房稅會造成起厝稅
袂
厝頭家當然會想欲共稅攏轉予厝跤負擔
毋過規个市場供應已經增加矣
你閣起就無人欲租矣
最後投資客佮建商就無才調繼續囤房
厝價顛倒嘛會落矣
第二點 發展無平均的問題
這有時間才閣討論矣
參考看覓