公視新聞網 https://news.pts.org.tw/article/671065
家將紀錄片"對手" 講破百年堂館的傳承佮挑戰
林緯廷／嘉義報導
發布時間：2023-12-12 19:15 更新時間：2023-12-12 19:50
https://www.youtube.com/watch?v=bXbQgInqqAU
嘉義予人叫做家將窟，在地的嘉邑慈濟宮、振裕堂，是嘉義地區創立上早的家將堂，為著
欲予民眾了解家將的文化，民俗研究者溫宗翰，佮團隊用八年的時間，翕一部紀錄片「對
手」，來探討傳承百年的家將文化，按怎面對新世代、新潮流的挑戰。
嘉邑慈濟宮振裕堂的先輩，真無奈講出社會對家將的觀感，這齣號做對手的紀錄片，用嘉
義市有百年歷史的、嘉義振裕堂八家將做主角，紹介家將的文化，家將成員講出怹的心聲
，嘛希望改變社會對家將的看法。
紀錄片導演溫宗翰表示：「社會大眾對普遍對這个家將，是有一種足深的一種歧視佇遐，
希望透過影片，予社會有一个新的看法，咱希望講逐家佇這个紀錄片內底，會使看著專業
的彼一部份。」
台南米街澤祐堂成員郭崇源表示：「傳統家將館其實對家將囡仔，抑是學生的要求足懸，
其實足嚴格，毋是像一般社會大眾所想的按呢。」
這齣紀錄片，描寫家將成員之間，互相一對手，兩人一組鬥搭，感情自平常時就要開始培
養。家將團的導師就指出，正港的家將訓練非常的嚴格，這馬肯學的少年囡仔也愈來愈少
，文化的傳承有真大的危機。
嘉義大學許同學表示：「看著紀錄片內底表示，振裕堂佮足濟藝術團隊，閣有政府合作，
我感覺這就是誠好的目標，按呢對家將的形象，攏有足大的改善佮幫忙，按呢足好的。」
振裕堂導師陳盈璋表示：「只要若陣頭提面巾的嘛講家將，曷若佮陣頭行做伙冤家就是家
將，阮家將足無辜就是按呢，少年囡仔綴邊仔耍有可能，曷若講落去妝縛規工，出將佇遐
縛規工就可能無愛，無法度接受。」
紀錄團隊用8冬的時間完成製作了後，這馬開始佇學校抑是社區來推廣放送，導演嘛會邀
請振裕堂的成員到現場，分享影片以外家將的故事，希望予民眾會當沓沓仔，來認捌家將
的傳統技藝佮文化。
陳玟芯/編輯