公視新聞網 https://news.pts.org.tw/article/670883
國家文藝獎公佈 歌仔戲國寶陳鳳桂等4人得獎
呂尚儒 莊浚佑 / 臺北報導
發布時間：2023-12-11 19:15 更新時間：2023-12-11 20:16
https://www.youtube.com/watch?v=bAEDKWCVYCI
國藝會今仔日公佈第23屆國家文藝獎著獎者，分別是傳統戲曲的表演者-小咪老師、作家-
夏曼藍波安、和視覺藝術家-梅丁衍，佮紀錄片導演-劉嵩，四个人得獎，今年舞蹈、音樂
、建築這三類無選出來。(本則新聞標題、導言、內文皆為台語文)
為著欲表揚佇藝術領域成就出眾的藝文工作者，國藝會每2年辦一改國家文藝獎，針對文
學、戲劇等等七个類別選出著獎者，著獎的人會當得著獎座佮獎金一百萬。國家文藝獎今
年是第23屆，佇12/11公佈4位得獎名單，包括表演藝術家小咪老師(陳鳳桂)、作家夏曼‧
藍波安、視覺藝術家梅丁衍、佮紀錄片導演劉嵩。
國家文化藝術基金會董事長 林淇瀁：「in攏咧家己的領域，釘根真濟年，創作無中斷，
in對在地出發，但是也連結到規个國際，展現咱臺灣藝術創作的多元佮性命力。明年的4/
26欲為這4位著獎者，舉行隆重的頒獎典禮」
董事長林淇漾補充說明講，今年因為佇咧音樂、舞蹈佮建築類分別佇咧複審、決審無選出
名單，所以最後干焦選出4位著獎者。記者會後，臺語台嘛特別採訪佇咧歌仔戲領域傳承
、創作等等攏非常出擢的小咪老師，老師講家己毋是自細漢就學歌仔戲，真正是下真濟苦
工去看老一輩按怎做戲。
國家文藝獎著獎者 陳鳳桂(小咪)：「我誠實是嫁歌仔戲，我較早是佇咧歌舞劇團的，我
到30幾歲才進入歌仔戲，所以我會當提著遐爾濟獎，我真正是這一生真正是無彼个遺憾矣
啦」
小咪老師講會當得獎伊真歡喜，但是伊上放袂落的猶原是歌仔戲的傳承，小咪老師講伊會
繼續共家己會曉的攏搬搬出來，嘛向望學生會當學著戲劇表演內底上幼路的物件。
張曼亭/編輯