公視新聞網 https://news.pts.org.tw/article/669787
新住民.移工通譯專業度不一 民團呼籲著認證
呂尚儒 謝季潾 / 臺北報導
發布時間：2023-12-04 19:15 更新時間：2023-12-04 19:48
https://www.youtube.com/watch?v=WikxW_P2MoY
佇咧電視劇「八尺門的辯護人」內底，司法通譯的角色非常重要，予雙方佇無仝語言之間
會當順利溝通。其實外國人口佇臺灣已經超過100萬人，in嘛會拄著勞資爭議、醫療服務
等等的問題，遮的攏需要通譯協助。今仔日立法院就有召開公聽會，召集專家和各部門來
探討通譯制度和培訓。(本則新聞標題、導言、內文皆為台語文)
佇咧電視劇"八尺門的辯護人"內底，司法通譯的角色非常重要，予雙方佇無仝語言之間會
當順利溝通。根據勞動部的統計，新住民、移工等等，遮的外國人口佇臺灣已經超過100
萬人，in也會拄著勞資爭議、醫療服務等等的議題，遮的攏需要通譯協助。但是目前培訓
、認證等等攏是由政府部會抑是地方家己辦理，無統一的制度，民團指出按呢致使通譯專
業度無一致，建議政府愛建立統一的認證制度。
桃園市群眾服務協會移工政策處主任 汪英達：「應該愛有這个認證的辦法，予in會當有
好的專業的能力佮證書。然後閣有一个退場機制的問題，必須愛予品行無好的，抑是專業
度無夠的，捌去予人投訴過的通譯抑是翻譯，有退場的機制」
新住民家庭成長協會秘書長 柯宇玲：「統一會當共通譯的培訓抑是機制，會當設定做一
个是共同公用的，一个是各部門有各部會專門的」
為著欲保障新住民的權益，立法院和專家、學者佮濟濟政府部門佇拜一召開公聽會，民團
針對通譯的培訓佮認證制度提出濟濟建議，嘛認為應該愛成立專門單位來負責。
台灣司法通譯協會創辦人 陳允萍：「尤其內政部、警政署佮移民署咧做遮(通譯培訓)，
伊本身就是司法警察佮準司法警察，這哪會使去培訓司法通譯咧？麻煩啦，猶是專業的愛
交予專家去做」
公聽會當中包括法務部、警政署等單位，攏表示願意支持建立統一的通譯制度。針對建立
專業用辭資料庫這部分，移民署指出，行政院有指示內政部咧做，有共專業的詞類掠出來
欲建立通譯資料庫，予雙語翻譯會當愈順利，嘛有共無仝專業的費用分出差別，向望制度
會當一步一步健全。
張曼亭/編輯