公視新聞網 https://news.pts.org.tw/article/664227
高雄邀請傳統戲團去學校表演 釘根母語文化
鍾依憓 邱紹揚 / 高雄報導 發布時間：2023-10-30 19:15 更新時間：2023-10-30 19:36
https://www.youtube.com/watch?v=zoo0ZFnAuD8
為著欲予偏鄉的學生會當親近傳統藝術，高雄市文化局舉辦藝術體驗教育計畫，邀請各種
多元的傳統戲曲入去學校演出，嘛予囡仔會當學著臺灣本土語的媠。（這條新聞標題、導
言、內文是臺語文。）
劇團團員手勢老練，將布袋戲尪仔弄甲誠活潑，演出「我是英雄」這段戲劇，金鷹閣電影
木偶劇團來到翠屏國小表演，台跤的學生囡仔看了是那笑那拍噗仔，攏感覺誠趣味。
高雄市楠梓區翠屏國小學生 郭庭妤：「佮我佇電視頂懸看著的無仝款。」
高雄市楠梓區翠屏國小學生 林柏叡：「我聽著一寡聽有的臺語，就知影咧講啥物。」
高雄市楠梓區翠屏國小校長 黃景良：「學校希望講臺語推廣的語言，佮文化一直推廣下
去。」
囡仔毋但佮意布袋戲尪仔，遮的小朋友閣會當穿歌仔戲的衫褲，綴演員的動作學搬歌仔戲
，高雄市尚和歌仔戲是將童話故事加入歌仔戲的元素，設計遊戲，嘛予小朋友佇台頂用台
語表演，做歌仔戲演員佮逐家互動，透過表演學生會當學習台語口白佮詞彙，這攏是課本
學袂著的智識。
高雄市尚和歌仔戲劇團演員 蔡馨慧：「有一寡囡仔打扮做小旦，阮會用簡單的方式，予
囡仔用簡單的自我紹介來講兩句臺語，現場學。」
高雄市政府文化局副局長 簡美玲：「囡仔經過傳統戲曲的欣賞，毋但會當欣賞節目的好
，嘛會當學臺語。」
高雄市文化局舉辦藝術體驗教育活動，因為疫情停辦3冬，今年總算閣開始安排劇團去校
園演予偏鄉學生看，今年有七个劇團，攏總演出24場，向望透過藝術體驗教育計畫，毋但
予學生認捌傳統戲曲，也會當予母語釘根。
陳稷安/編輯