公視新聞網 https://news.pts.org.tw/article/659992
「左轉有書」德國講座 對獨立冊店講破臺灣民主
呂尚儒 莊浚佑 / 臺北報導 發布時間：2023-10-03 19:15 更新時間：2023-10-03 19:41
https://www.youtube.com/watch?v=LlvMaR8WjlI
臺北的讀立冊店「左轉有書」，這個月欲去德國辦講座，嘛欲佮當地的獨立冊店互相交流
。這回也邀請黃信堯為交流計畫拍影片，用臺語配音紹介臺灣各地的獨立冊店，向望予國
際社會閣較了解咱臺灣。（此則新聞標題、導言、內文皆為臺語文。）
短片 台灣，若是一間獨立書店
遐的賣著冊 賣著報紙
賣著袂當大聲講出的一切
民主是臺灣的驕傲，多元類型的獨立冊店也是臺灣的特色之一。影片內底紹介北中南8間
無仝的獨立冊店，由黃信堯導演家己配音佮攝影，這支短片就號做「台灣，若是一間獨立
書店」，是臺北"左轉有書"這間獨立冊店這個月為著欲去德國交流的計畫所做的短片，欲
共臺灣獨立冊店的特色、和民主化過程的歷史脈絡，用短片簡單紹介予外國了解。黃信堯
導演講，獨立冊店因為逐間攏無仝，所以毋才會精彩。
導演 黃信堯
臺灣是一个非常有特色的所在
就親像是咱其實結合非常濟的
歷史佮文化
獨立冊店嘛是仝款
各自發展
佇逐个所在會生出無仝獨立冊店的模樣
左轉有書負責人指出，獨立冊店佇咧咱民主化的過程扮演真重要的角色，不管是戒嚴、抑
是白色恐怖時期，濟濟的冊店、報紙擔和黨外雜誌社，抑是318日頭花運動以後，各地出
現的公民論壇型的獨立冊店，攏予冊店成做智識交流和民主思想的重要基地，左轉有書的
負責人講，佇這馬臺灣沓沓受國際重視的時陣，是一个予外國認捌咱的好時機。
左轉有書負責人 張慧如
佇咧中國宇宙國安法通過了後
我感覺臺灣這馬的獨立冊店
抑是臺灣的冊業
佇咧華文箍仔
應該算是最後的一塊民主聖地
雖然臺灣的冊業真正是足慘的
毋過這爿至少是自由的
左轉有書欲組成團隊，除了去到德國辦講座，分享臺灣的出版業、冊店和社會韌性，也欲
借這改機會聲援八旗總編輯富察，嘛予國際了解中國對臺灣言論自由和出版業的威脅。
洪家馨/編輯