公視新聞網 https://news.pts.org.tw/article/657220
國慶大典邀請金獅陣 傳統藝陣連2年上台表演
李晨宇 / 臺南報導 發布時間：2023-09-16 19:15 更新時間：2023-09-16 19:49
https://www.youtube.com/watch?v=6ySrM9IcFcE
台南本淵寮朝興宮金獅陣，傳承到今百外年，今年是會頭一改參與雙十大典演出，佇
雙十現場，會有七分鐘的精采表演，祈求國泰民安。(這則新聞標題、前言、內文為臺語
文。)
拍鑼挵鼓鬧猜猜，當咧箍陣拍箍，準備欲拍拳做練習。臺灣傳統藝陣百百款，舊年國
慶大典邀請西港刈香的3隊武陣，包括寶安宮代天府白鶴陣、西港廣慈宮佮興安宮的金獅
陣，若今年嘛頭一改予人邀請上北表演的本淵寮朝興宮的金獅陣，對1920年成立到今傳承
104冬，上起早是用守護地方，後來煞變成神明的陣頭。閣賰無一個月欲正式上場，廟方
表示，全莊攏動員起來，一禮拜練四改真綿爛練習。
朝興武館成員講：「來遮練習金獅陣阮欲上臺北表演，練這嘛會使當做是運動佮歇睏的活
動。」
本淵寮朝興宮金獅陣督陣蔡文隆講：「阮的特色是阮是數代傳承，阮包括對老中青按呢訓
練，攏是一代過一代直直共傳落來。」
本淵寮朝興宮的獅頭是用錫落去做的，在地人攏叫獅祖。廟方講，開館到今無咧謝館
，平常時獅祖就囥佇廟予人參拜，若有出陣加加請一隻。毋過，特別的是，這改國慶大典
當天會使一改看著三隻獅祖出門的景象。
本淵寮朝興宮主委顏國在講：「這个獅頭表演一般攏是，一隻獅一隻獅祖咧爾，罕咧
百年有一改機會，所以才有這改參加國慶，按呢有三隻獅祖來出門，這是非常的難得。」
金獅陣佇西港刈香武陣是黃跤巾系統，每一个跤巾的跤法拳路攏有無仝的特色，將佇
後個月國慶，帶來七分鐘的精采表演，欲予全國看著百年金獅陣出陣的威風。
張曼亭/編輯