公視新聞網 https://news.pts.org.tw/article/652179
迎接大士爺文化祭 民團規畫導覽.辦桌宣傳食食
林緯廷 / 嘉義報導 發布時間：2023-08-19 19:15 更新時間：2023-08-19 19:43
https://www.youtube.com/watch?v=5rMLJvvXTKg
民雄大士爺廟，是嘉義民雄真重要的信仰中心，舊曆7月21到23、有大士爺文化祭，是嘉
義縣一年一擺的重要宗教活動。為著欲予民眾，會當閣較了解在地的文化，嘉義縣當地的
文化協會，特別規畫文化導覽的活動，而且閣辦桌，予逐家體驗在地的食食。(這則新聞
標題、前言、內文為臺語文。)
對民雄火車頭出發，打貓街坊文化協會的文化導覽，tshuā逐家行入去菜市仔，閣用辦桌
的方式，紹介民雄的食食。
活動導覽人吳至鎧講：「逐年這个大士爺的下街，下街就是阮遮祭典的時陣，阮遮攏會辦
桌，因為阮欲予愈濟人會當來認捌民雄遮的食食，所以這改是揣遮市仔的一寡，在地料理
。」
參加民眾張先生也講：「今仔日按呢走一輾，按呢佇桌頂來食，我感覺就是透過食
來閣較了解民雄這爿店頭，食食風俗習慣按呢。」
舊曆七月21到七月23，是嘉義縣民雄的大士爺文化祭，在地的文化協會，會先規畫文化走
讀的活動，希望逐家毋但只是來參加熱鬧的宗教活動，嘛會當認捌祭典背後的文化意義。
參加民眾王小姐感覺：「大士爺祭對民雄來講，會當講是一種代表的感覺，對民雄這个所
在，市場閣有大士爺廟的歷史，有增加一寡認捌，感覺誠歡喜。」
打貓街坊文化協會企劃黃顯淨講：「比如講放水燈，阮會tshuā逐家按照實際放水燈的路
線、tshuā逐家去看，這馬科儀是按怎來進行，在地彼當陣是咧做啥物代誌。」
逐年舊曆七月的大士爺文化祭是嘉義民雄重要的活動，文化協會指出，除了放水燈的儀式
，猶閣有大士爺開眼、火化升天的導覽活動，最後閣會tshuā逐家去到一寡在地知名人士
的故居，予大士爺文化祭的活動，加添民雄在地的歷史記持。
張曼亭/編輯