公視新聞網 https://news.pts.org.tw/article/643120
烏國難民申請臨時保護 匈牙利人道組織鬥相共
郭柏均 莊浚佑 張育睿 / 布達佩斯報導 發布時間：2023-06-24 19:15 更新時間：2023-
06-26 09:10
https://www.youtube.com/watch?v=cej2FOc1lYg
匈牙利的隔壁就是烏克蘭，自從露烏戰爭發生到今，有超過400萬的烏克蘭難民、身婁過
匈牙利，走去其他國家，也有三萬外人佇匈牙利申請臨時保護。但是佇外國徛起本成就是
真困難的代誌，來看當地一个人道組織HIA，是按怎幫助遮的難民度過難關
濟濟囡仔徛做伙，綴老師一爿跳舞、一爿唱歌，這是匈牙利當地的人道救援組織HIA，所
成立的烏克蘭難民囡仔幼兒園，幼兒園成立到今1年左右，目前有35个踮佇匈牙利的烏克
蘭難民囡仔、佇遮學習。
HIA幼兒園園長 Irina：「音樂治療佇遮是上重要的代誌，因為這會使幫助囡仔放輕鬆，
而且過了較好。」
臺語台記者 郭柏均：「記者這馬佇咧匈牙利上大的國際宗教人道救援組織HIA，伊是幫助
烏克蘭難民，因為真濟難民，尤其是囡仔會拄著語言抑是融入社會等等問題，所以也提供
語言的教學服務，予難民一寡幫贊。」
拄著戰爭的烏克蘭難民對烏克蘭國內、一直往西爿行，就會到匈牙利，到今已經有超過
400萬烏克蘭難民經過匈牙利，離開烏克蘭，有35000人佇匈牙利申請臨時保護身分。但是
匈牙利的語言、文化等等，攏參in無相仝，生活是拄著濟濟問題。
匈牙利人道救援組織HIA負責人 Zoltán Sipos：「上大的問題就是語言的無仝，但是猶
有其他的代誌，親像蹛的問題閣有按怎得著社會服務。」
烏克蘭難民：「我定定來遮佮烏克蘭人見面開講，我也定來遮得著法律上的協助，也來看
志工醫生。」
HIA表示，in目前已經幫助700外个烏克蘭家庭生活，對食食、醫療、法律、教育這寡方面
提供幫贊。但是HIA也拄著濟濟挑戰，親像中心本身無法度提供處方藥仔、閣有通予這寡
難民蹛的空間也無濟，紲落來會透過參其他組織合作等等方式，沓沓揣出路。
買湘瑩/編輯