公視新聞網 https://news.pts.org.tw/article/641976
臺南市亭仔跤畫"整齊線"禁停車 民眾霧嗄嗄
李晨宇／臺南報導 發布時間：2023-06-16 19:15 更新時間：2023-06-16 20:49
https://www.youtube.com/watch?v=qeJJHAARCRg
真濟所在亭仔跤予機車占用，臺南市政府進前佇市區亭仔跤有畫一種青色的線，毋過，遮
煞予民眾看甲霧嗄嗄，共這條線當做是停車線。實際上這條叫整齊線，袂使停任何車，交
通局也講白色格仔才會當停車。 （此則新聞標題、導言、內文皆為臺語文。）
來到臺南市區，看著真濟民眾共機車停佇亭仔跤青色的線，附近民眾掠準這條青色的線是
予人停車，其實遮攏是違規。原來，這條青色的線叫做整齊線，是工務局為著過路人安全
佮兼顧店家生理所畫的，實際上這條線無代表會使停車。
在地居民表示：「(按呢阮)機車欲停佗位？若講欲來揣店家買物件，請問阮的車欲囥佗位
？」
另外在地居民表示：「(敢是會使)停的青色(線)內底，袂使超過青色(線)，(若)超過青色
(線)就會予人罰錢。」
臺南市第五分局交通組長林貴蘭表示：「依據道路交通管理處罰條例規定，亭仔跤、人行
道攏是道路的範圍，專供行人通行使用袂使停汽機車。」
中央的法規有明確規定，亭仔跤原則上是禁止停車。毋過，因為臺南舊城區有濟濟亭仔跤
，市府考慮著現狀，欲全面淨空有難度，才畫青色的整齊線，規範亭仔跤攤販，想袂到這
馬民眾當做是停車線。交通局表示，亭仔跤唯一會當停車的，是這種畫白線的格仔。
臺南市交通局簡任技正黃俊傑表示：「(青色的整齊線)並毋是機慢車的停車線，嘛是欲呼
籲民眾猶是愛揣有適當，有交通主管機關規範的白色停車線，才是一个合法停車的位置。
」
交通局表示，住戶猶是店家若有亭仔跤有保留超過1.5米的通行範圍，會使向交通局來申
請設白色停車線，相關單位會去現場評估，針對違規停佇亭仔跤的車，警方雖然袂主動取
締，若是接著檢舉，猶是會勸導，準講明顯妨害過路人行路，嘛會開罰單。