公視新聞網 https://news.pts.org.tw/article/637989
文化部發1200箍禮金 案內18-21歲買冊.看表演
鄭雅文 張育睿/ 臺北報導 發布時間：2023-05-22 19:15 更新時間：2023-05-22 19:37
https://www.youtube.com/watch?v=_0J87jxxOKI
文化部的成年禮金1200箍，6月初6就欲開始發18歲到21歲、攏會當領。國家兩廳院、台中
國家歌劇院、衛武營國家藝術中心、閣有、國家交響樂團，做伙宣佈:到年底，配合成年
禮金，會開出7千个、價數3百箍的青年座位，鼓勵少年人來接觸藝術。(本新聞標題、導
言、內文皆為臺文)
6月初6開始，少年家若領著文化部的成年禮金、就通買票來國家兩廳院看演出。
文化部長 史哲：「咱少年人佇青春的時陣，就予表演藝術行入家己的性命內底，實際上
就真困難閣離開。」
為著推展藝術表演，國家兩廳院、台中國家歌劇院相關的三館一團，宣佈到年底欲推票
價三百箍的青年座位七千張，若使用成年禮金、來買票閣拍五折，希望予青年也通行入國
家級的劇場，接觸無仝的表演。
青年學生：「其實阮身軀有的錢無遐濟，佮電影等娛樂相比，(看表演)確實是錢會開較濟
。」
有學生代表就表示，雖然家己是愛去劇場看戲的人，但身軀邊的朋友真濟就較無接觸劇場
。衛武營國家藝術文化中心表示，自文化部宣布欲分成年禮金以來，IN的青年卡片、申辦
量就加三成外。in認為少年人過去會考慮表演藝術票傷貴，這改有政府資源入來，無的確
會當唌少年家來接觸藝術。
衛武營國家藝術文化中心總監 簡文彬：「過程內敢有彼咧機會去接觸到一寡特定的物件
，這可能就會變未來若有機會去參加，伊就會去(參加)。」
文化部的成年禮金政策，第一冬的預算超過10億，全國18歲至21歲、估計有上百萬个青年
攏通領著千二箍，除了會當看國片、買冊，也通行入劇場。文化部長也表示，毋驚人來、
是驚無人來，這改推廣劇場結合成年禮金，就是希望鼓勵少年人行入劇場來看表演。