公視新聞網 https://news.pts.org.tw/article/634226
行政院通過「語發中心」草案 保存母語、弱勢語言
郭柏均 張育睿 / 臺北報導 發布時間：2023-04-27 19:15 更新時間：2023-04-27 20:27
https://www.youtube.com/watch?v=td7BLeYMAv0
行政院今仔日通過草案，欲來成立國家語言發展中心，推動弱勢語言的傳承和發展。有母
語團體就指出，紲落來愛繼續關注，語發中心分配著偌濟資源，欲按怎來行動。(本則新
聞標題、導言、內文皆為臺文)
文化部人文及出版司司長 陳瑩芳：「優先推動面臨傳承危機的國家語言的傳承、復振佮
發展。」
臺語等等母語的傳承危機，已經無法度閣等待。27行政院記者會宣佈，通過「國家語言研
究發展中心設置條例」草案，會以行政法人的方式，成立語發中心，改善臺灣濟濟當咧面
臨流失、斷層遮的危機的語言。
文化部人文及出版司司長 陳瑩芳：「整體業務咱欲推動的是語言的調查佮出版，閣有佇
語料的史料收集佮研究也需要做。書寫系統、拼音閣有未來數位應用的推動，也是語發中
心的重要任務。」
文化部表示，希望這个中心會使成做各部會推動母語相關工課的基礎佮智庫。母語團體指
出，設立語發中心，已經拖真久矣，雖然推出草案是好消息，但是紲落來也愛關注，中心
會使分配著偌濟預算、佮資源。
李江却台語文教基金會執行長 陳豐惠：「咱欲用偌濟氣力、偌濟公共資源，去搶救有傳
承危機的國家語言？用按呢來想，應該足好去訂講規模、預算愛偌大才有夠。過去無做的
物件，這馬愛做，可比講大量無仝專業領域的外來語詞、新的語詞，遮的國家語言按怎去
因應、欲按怎去翻譯。」
陳豐惠表示，自2019年《國家語言發展法》施行了後，就規定愛規劃專責單位、推動國家
語言；但是現此時，相關工課是文化部下跤的一个科咧負責，權力傷細。行政院表示，語
發中心草案、落尾會送立法院審議，也指示文化部參各黨團協商，望趕緊三讀完成立法。