公視新聞網 https://news.pts.org.tw/article/633871
指揮中心今欲退場 學者：猶愛防變異致重症死亡
鄭雅文 林郁凱 / 臺北報導 發布時間：2023-04-25 19:15 更新時間：2023-04-26 12:20
https://www.youtube.com/watch?v=sbPHiY_9iGg
疫情指揮中心對2020年1月20，成立到今千外工，這馬宣佈後禮拜，5月初一開始欲解散。
紲落來欲按怎預防疫情閣夯起來？有學者建議，愛定期檢測環境，嘛愛繼續做血清抗體調
查。追蹤高風險族群，避免重症死亡，逐家才袂驚惶，才有才調恢復疫情進前的生活。(
本則標題、導言、內文皆為臺語文)
新冠疫情滾絞3年外，這陣大部分的人攏沓沓仔恢復正常的生活，中央疫情指揮中心宣布
、對5月份開始，新冠肺炎嘛對第5類傳染病、降做第4類。
民眾表示：「我是感覺講應該綴時代潮流，這本來就是一咧趨勢」、「(疫情)閣起來，著
閣注疫苗抑是閣食藥仔，兩三冬、逐家攏慣勢就好」
受新冠疫情的影響，咱國內佇2020年1月20開始，三級開設中央疫情指揮中心，到疫情上
嚴重的時，嘛升到一級開設，疫情指揮中心運作千外工，攏無歇睏。這馬欲降級，有學者
認為，予生活恢復正常，是有必要的，毋過相關單位對高危險群應當繼續掌握。
中研院研究員 何美鄉表示：「真少的一寡人，嘛是會閣重症、死亡，若是有這款重症的
人開始，人數咧增加的時，咱著愛知影講這敢是一个新的變異種閣出來，這款工課袂使停
」
有學者也建議政府、對人佮環境、攏愛繼續分析閣監測，就算降級，一寡機制猶是袂當放
冗。環境的部分就愛定期做廢水的檢測，人的部份，建議愛繼續做血清抗體的調查，了解
國人的抗體數。
台大公衛教授 詹長權表示：「逐年攏有按呢做，咱就知影講咱血清的濃度到啥物程度，
愛去追蹤伊身軀內底注預防射的效果敢有維持」
專家嘛建議高危險族群，親像有慢性病、無注疫苗的、抑是65歲以上的濟歲人、準講有感
冒的症頭就愛去驗看覓、敢是去穢著新冠肺炎。共目標設定佇"零死亡"，逐家才袂驚惶，
才會當真正恢復往過的生活。