公視新聞網 https://news.pts.org.tw/article/633453
上強春雨添6千外萬噸水 主要落佇雲林以北
郭柏均 張育睿 / 台北報導 發布時間：2023-04-22 19:15 更新時間：2023-04-22 19:55
https://www.youtube.com/watch?v=om8YQSBSzeY
頂日仔、鋒面通過，上強的春雨、落煞了後、全台水庫增加6千萬外噸的水，毋過南部的
水情猶是無變好。水利署表示，20的鋒面，雨水主要攏集中佇雲林以北。南部的水庫，欠
水猶是欠甲真食力。(此新聞標題、前言為臺文)
拜六早時佇台北市的大佳河濱公園，無落雨，天氣烏陰烏陰。氣象局表示，禮拜日到拜二
因為透東北風佮東風，食風面的北部、東北部可能會落雨；南部是以西北雨為主。
中央氣象局預報員葉致均表示：「明仔載到拜二的天氣，水氣攏較少，北部佮東半部的雨
，攏是小可仔雨，估計雨勢攏袂傷大，中南部濟雲天氣為主，下晡山區、佮倚山區的平地
，可能猶是有局部短暫陣雨出現。」
雖然因為20的鋒面，台灣各地攏有雨水，但是南部的洘旱、猶是無變好。22中晝，曾文水
庫的水量只有7%左右、南化水庫26%左右、蘭潭水庫大概25%，仁義潭水庫22%左右。水利
署表示，這个鋒面為全台水庫增加6017萬噸的水，但是主要攏集中佇中部以北。
經濟部水利署發言人王藝峰表示：「仁義潭佮蘭潭水庫加起來，只有入來30萬噸，曾文水
庫加上烏山頭水庫，大概只有入來100萬噸、非常有限。以曾文佮烏山頭來講，蓄水率並
這擺落雨進前，閣減少0.2%，雖然有一寡入水量，但是用水量猶是有。」
南部主要的水庫、水量無變濟，顛倒閣變少。氣象局估計，25佮30、攏有鋒面會到位，毋
過通過的速度真緊，雨水袂有20的鋒面遐爾濟；南部的洘旱，可能愛等到5月中以後的黃
酸雨、才有才調改善。