公視新聞網 https://news.pts.org.tw/article/632613
新冠疫情轉和 喙罨國家隊功成身退拚轉型
鄭雅文 謝季潾 / 桃園臺北報導 發布時間：2023-04-17 19:15 更新時間：2023-04-17
19:45
https://www.youtube.com/watch?v=91Iq4B9sPfQ
今仔日開始，坐大眾運輸已經毋免掛喙罨。講著喙罨，佇疫情滾絞的期間，發揮真大的作
用，特別是喙罨國家隊用真緊的速度大量生產喙罨，閣會通拚喙罨外交。這馬喙罨漸漸解
禁，政府嘛開始輔導業者轉型。(本文新聞標題、導言、內文皆為臺文)
製作立體喙罨的機器當咧運作，桃園的這間喙罨業者，進前是喙罨國家隊的成員之一，彼
陣全臺有1/4量對in遮來。
喙罨業者公關行銷主任 張紫淅：「佇疫情上嚴重的時，阮一日生產大概300萬片提供政府
徵收
講著喙罨國家隊，經濟部當時佇2020的1月底宣佈成立，佇逐家仝心之下，40工內組建92
條生產線，予喙罨產量對原本一工生產188萬塊漸漸提升到一工生產3千萬塊，甚至促成喙
罨外交。只是這陣疫情轉和、喙罨陸續解禁，掛喙罨的人也漸漸仔減去。
民眾：「病院可能較會掛，抑若外口的話，我是感覺空氣若較流通就毋免掛。」
需求量減，業者也綴咧轉換重心，除了看訂單量開產線，也將主要的生產力轉往客製化，
抑是開發新品，業者嘛當咧研發會當回收的環保喙罨，用多樣化方式應變。
喙罨業者公關行銷主任 張紫淅：「進前會依一般醫療平面成人喙罨為主，這馬就是五成
會做一寡客製化，抑是無仝款式的設計。」
經濟部工業局民生化工組長 李佳峯：「阮最近有申請一个疫後特別條例(補助)，相關的
廠商會當佇升級轉型方面來拍拚。」
經濟部表示，行政院規畫的疫後預算，經濟部有特別編110億，協助製造業轉型發展，走
向低碳化、智慧化生產。最近嘛會開放有需要的廠商去申請，用輔導、補助等措施、協助
業者升級。