公視新聞網 https://news.pts.org.tw/article/630724
明日各地仝款好天 拜四開始受鋒面影響會落雨
郭柏均 林郁凱 / 臺北報導 發布時間：2023-04-04 19:15 更新時間：2023-04-04 20:08
https://www.youtube.com/watch?v=oaDWij9FKSk
明仔載是清明連假的上尾工，氣象局估計天氣佮今仔日仝款，到拜四才會落雨。抑若窒車
的部分，高公路局表示各地頭上北的車陣過晝就開始出現，宜蘭到台北對早起九點就開始
窒，建議民眾愛閃過窒車的路段佮時間。(本則新聞標題、導言、內文皆為臺文)
假期閣拄著好天氣，加上親像台北市立動物園等等全台各遊樂區，攏推出兒童節優惠，四
界攏大人囡仔出門tshit迌。拜三是連紲假期上尾一工，氣象局表示，天氣佮拜二會仝款
，毋過拜四開始各地頭攏會變天。
中央氣象局預報員 葉致均：「拜四拜五鋒面才會通過台灣地區，落雨的狀況對北到南，
攏會有一寡落雨的狀況產生。溫度較明顯變化是佇拜五拜六這兩工，因為東北季風增強，
對北台灣來講，這兩工攏降到無20度。」
收假日路況的部份，高速公路局估計明仔載各地頭的上北車流，中晝了後就會開始出現，
佇國道五號的部份，對早時九點就會開始窒，一直窒到暗時八點。建議民眾避免窒車的路
段佮時間。
高公局國道路況預報員 陳文瑜：「建議南部地區民眾會使佇9點以前出發，中部地區會使
佇12點以前出發；國五上北民眾建議會使佇收假日的9點以前出發。」
高公局表示，拜三國道五號上北蘇澳到頭城、繼續實施高乘載管制，國道以單一費率收費
、0到5點暫停收費；也鼓勵民眾使用西濱快速道路、省道等等替代路線，避免窒車。