公視新聞網 https://news.pts.org.tw/article/614245
民團.新北政府合作 設計新糞埽桶引導正確分類
郭柏均 張育睿/新北報導 發布時間：2022-12-15 19:15 更新時間：2022-12-15 19:46
https://www.youtube.com/watch?v=4-Vx7IAfkpc
真濟公共糞埽桶民眾定定毋知按怎分類，猶有一寡仔人規氣共糞埽凊彩抨咧頂懸。有民間
團體佮新北市政府合作，重新設計糞埽桶，希望引導民眾做正確的糞埽分類。
淺色設計、糞埽分類資訊寫共真詳細，這是民間團體推出的新型糞埽桶。望減少民眾糞埽
分類錯誤。表面做趨趨，也避免民眾凊彩共糞埽抨咧糞埽桶頂頭。過去新北歡樂耶誕城期
間，計共有欲四萬公斤的糞埽，今年佇市府內底囥兩跤這款糞埽桶，試看覓成效如何。
新北市環保局長 程大維表示：「糞埽應該按怎分，有時陣會困擾民眾，你愛予民眾會使
簡單理解。」
重新思考環境教育協會執行長 黃之揚表示：「咱其實做真濟資訊佮指引的設計，幫助民
眾會使真緊就去揣著，對應的糞埽桶。民眾看著糞掃桶會感覺講，這是啥物糞埽桶，哪會
生甲遐爾特別，進一步伊會好好仔揣，會使按怎好好仔做幼路的分類。」
根據民間團體的統計，咧做回收的時，有四成外的民眾認為，糞埽桶的標示無清楚，致使
毋知欲按怎分類；經過測驗，發現這款糞埽桶會使提懸民眾正確分類的比率，對26%增加
到53%。
重新思考環境教育協會執行長 黃之揚表示：「趨面的設計會使幫助民眾，無法度共糞埽
囥佇頂懸，所以愛去共糞埽做幼路的分類，真濟附近的店頭也講，總算有潘的分類，因為
過去潘毋知按怎分類，攏抨佇一般糞埽。」
這款糞埽桶因為是特別訂製，成本愛五萬到十萬，並一般的公共糞埽桶5000-6000，是貴
真濟；民間團體表示，未來若產量提懸，抑是做簡單的重新設計，攏會使降低成本。