公視新聞網 https://news.pts.org.tw/article/612578
攻烏道爭議 王鴻薇:吳怡農毋敢建議開除黃承國
郭柏均 張育睿 / 台北報導 發布時間：2022-12-05 19:15 更新時間：2022-12-05 20:07
https://www.youtube.com/watch?v=0afMRlmwVrk
台北市第三選區立委補選，烏道議題吵了真熱；國民黨王鴻薇質疑民進黨吳怡農，是前國
策顧問黃承國佇背後咧共操作，唱吳怡農毋敢建議黨中央、共黃承國開除。吳怡農表示，
民主政黨有一定的程序愛行。另外王鴻薇也提出核二、核三廠延後除役的想法，也予吳怡
農批評，政策袂使干焦喝口號。
熱情佮民眾互動，國民黨立委補選參選人王鴻薇初五出席信義區行政大樓開幕典禮。針對
選戰，伊進前質疑民進黨參選人吳怡農，是前國策顧問黃承國的傀儡，而且閣講有烏道背
景，唱吳怡農敢敢建議民進黨開除黃承國，吳怡農初三也佇面冊呼籲黨中央說明立場。
民進黨立委補選參選人 吳怡農表示：「政治毋是喝爽的，民主政黨民主政治也是有程序
的，袂使因為對手陣營，國民黨的抹烏，咱就開始倒爿開除一个黨員、正爿開除一个黨員
，這毋是咱的做代誌方式，嘛無應該按呢」
國民黨立委補選參選人 王鴻薇表示：「這毋是我家己喝爾，是吳怡農家己對黨中央咧喝
。吳怡農家己彼篇面冊文章敢是發好耍，抑是發心酸的」
另外進前王鴻薇講，欲綴國際趨勢，伊支持核二、核三廠延役，這个想法嘛受著吳怡農批
評。
民進黨立委補選參選人 吳怡農：「政策佮政治毋是喝口號爾，咱袂使靠喝口號來決定咱
的政策方向。我對這禮拜開始，透過每一場政見發表會，會一項一項向逐家報告」
國民黨立委補選參選人 王鴻薇：「美國、日本、歐洲、南韓，攏有延役核電廠，這是毋
是參國際相連，所以吳怡農先生，你咧講我是口號的時，我先請你做功課」
針對烏道議題，民進黨團也研議欲修正公職人員選罷法第26條，規定牽涉著烏、金、銃、
毒的人袂使參選。王鴻薇表示，民進黨講欲掃烏，仝一工內政部長徐國勇就講欲落台，批
評這是一件離經的代誌。