公視新聞網 https://news.pts.org.tw/article/599486
臺南七股tshāi滿光電枋 水鳥生湠.居民生活受影響
林思皓 謝季潾 綜合報導 發布時間：2022-09-12 19:15 更新時間：2022-09-12 19:50
https://www.youtube.com/watch?v=CcrkifdATAo
臺南七股是烏面抐桮、飛來台灣過冬的所在，毋過，現此時的七股，四界煞攏是太陽光電
板，規片的光電板煞共社區的面貌破壞了了。甚至有一部份光電場，就起佇社區當中，真
倚徛家，影響居民的生活空間。
臺南七股，鹽山真出名，嘛是烏面抐桮等等水鳥的棲地。毋過現此時的七股，四界攏是太
陽光電板。
七股監督光電青年聯盟成員王弼主表示：「像這馬我蹛的所在邊仔就有水田，暗時我攏會
當聽著鳥仔咧叫的聲音，若是光電板繼續按呢起落去，我想我真緊就會聽無遮的鳥仔，暗
時揣食的聲音矣。」
根據官方統計，目前臺南市是全臺灣光電板上濟的縣市，其中七股閣是臺南市上濟的區，
10%的土地頂懸攏是光電板。17个在地少年人自按呢成立七股監督光電青年聯盟。亻因十
二特別上北到立法院召開記者會，希望政府重視。
七股監督光電青年聯盟發言人沈軒宇表示：「中央政府訂出來的，2025年光電建置目標是
20 GW，所以咱會當看著干焦一个區，一个行政區來看，咱就佔大概20GW的二十分之一，
顯示這馬誠大的光電建置面積，佇仝一个行政區內底。」
這幾年，真濟少年人轉去故鄉創業，希望用七股的美食佮美景來推扌束觀光。毋過，規片
的光電板煞共社區的面貌破壞了了。
七股監督光電青年聯盟成員李博霖表示：「有一部份光電場就起佇社區當中真倚徛家，造
成居民生活空間佮視覺上的壓迫，影響漁村社區的景觀，衝擊遊客來遮行踏的意願，呼籲
政府欲發展光電，應該愛有整體的地景衝擊評估，而且佇聚落佮住宅的周圍設緩衝帶。」
針對七股少年人的訴求，經濟部能源局表示，現此時的光電案in攏會做環境佮社會檢核，
而且紲落來七股的漁電共生專區，限制干焦5%的土地會當起光電板。