公視新聞網 https://news.pts.org.tw/article/598111
石木欽佮翁茂鍾不當來往 改撤職.停止任用1年
郭柏均 張育睿 林郁凱 / 台北報導 發布時間：2022-09-02 19:15 更新時間：2022-09-
02 19:54
https://www.youtube.com/watch?v=6pRn-TaPb0w
前公務員懲戒委員會委員長-石木欽，佮富商-翁茂鍾有交際應酬，閣提供法律意見等等的
不當來往，原本懲戒法院一審判決罰款一年的薪水，今仔日二審改判石木欽撤職，而且停
止任用一年。民間司改會表示，對這个判決表示肯定。
前公懲會委員長石木欽予指控，佮富商翁茂鍾有不當來往，甚至以厝內人的名，買翁茂鍾
經營的公司股票得著利益。原本一審判決罰一年月俸。九月初二，二審決定廢棄原來的判
決，改判石木欽撤職，而且停止任用一年，嘛等於未來袂使擔任律師，全案確定。
懲戒法院書記官長 林玉苹指出：「長期佮翁茂鍾交陪、球敘、討論案情，猶閣有講訴訟
進度，佮提供法律意見，不當接觸佮不當買賣股票，計共十六項違失行為。原判決認為十
六項違失行為，其中十四項超過十年的追審期間，應該免議的部份屬於違法，因為法官的
懲戒，是就伊的違失行為做人格的總體評價」
懲戒法院表示，石木欽的違法行為自1997年到2016年，時間迒過法官法新法施行範圍，但
是十六項違失行為彼此攏有關係，應該整體看待，而且這改判決是以上尾的行為時間來認
定時間點。石木欽方面，石木欽透過律師回應，對這个判決表示遺憾。司改會對這个判決
表示認同。
民間司法改革基金會董事長 林永頌表示：「這擺的二審非常清楚表示，違失行為愛整體
觀察，而且嘛應該用法官法，阮對這个見解表示肯定。但是阮疑問的是，(法官法)上嚴重
是撤除法官職務，袂使閣擔任公務員，阮的疑問是為啥物毋是第一級」
石木欽案牽連大量法官、檢察官、警官等等攏接受調查，目前也猶有幾若个法官的案件當
咧審理，司改會呼籲懲戒法院用仝款的標準，做出上適合的處分。