公視新聞網 https://news.pts.org.tw/article/597543
陳時中提社會福利政策 和蔣萬安政見相比並
郭柏均 張育睿 林郁凱/台北報導 發布時間：2022-08-30 19:15 更新時間：2022-08-30
20:21
https://www.youtube.com/watch?v=rzcImXiiEQY
民進黨台北市長參選人陳時中，8/30提出社會福利政策，予人佮前一站仔國民黨的蔣萬安
所提出的鎖定新住民、育囝等等的社福政策做比較。另外一方面，無黨籍參選人黃珊珊，
透早就到伊做市議員時期的選區，內湖碧山巖開漳聖王廟，開始伊宣佈參選了後的第一个
參拜行程。
佮濟濟社福團體徛仝台，30民進黨台北市長參選人陳時中，提出伊的社會福利政策，鎖定
育兒、青年、序大、身心障礙、社福韌性五方面。外界共提來參前一站仔國民黨蔣萬安提
出的新住民、育兒等等社福政策相比並，陳時中認為家己的較完整。
民進黨台北市長參選人 陳時中表示：「我對社會福利參與的時間也算是長，參與愈長的
人，就感覺點無夠、線無夠，至少愛面，上好是一體攏愛成型。」
蔣萬安出席大安區後援會的活動，面對政策比較，伊是提出佇立法院的經驗來說明。
國民黨台北市長參選人 蔣萬安表示：「這兩屆每个會期，我攏佇社會福利衛環委員會，
仝款抱這款初衷佮態度，來提出閣較好，來予榁(弱勢團體)感受會著的政見。」
同時注重著財政紀律
根據一間電子媒體的民調結果，台北市長六个參選人，目前上競爭的三跤株支持度，蔣萬
安36%領先，紲落來是黃珊珊26%，陳時中是23%。面對民調結果，陳時中佮蔣萬安攏講，
民調做參考，會繼續拍拚。
民進黨台北市長參選人 陳時中表示：「若是有這款狀況，可能愛變甲閣較得人佮意。」
國民黨台北市長參選人 蔣萬安表示：「繼續深耕、拓展票源。」
「高票當選、三上香。」
仝一工，黃珊珊先去伊市議員時期的內湖選區，一早佇碧山巖的開漳聖王廟，佮里長、民
眾坐做伙啉咖啡，展現佇內湖的高人氣。閣有伊第一擺參選議員的志工，送伊當初時的競
選衫祝福。面對民調結果，黃珊珊並無真要意。
無黨籍台北市長參選人 黃珊珊表示：「逐工看民調，真正毋免做代誌矣，台北市民八年
前就放下予政黨綁票，政黨政治佇台北我感覺已經行到一个坎站。」
黃珊珊認為，台北市民大部分攏毋是藍嘛毋是綠，伊講，台北市選戰上大的議題，是愛按
怎爭取中間選民的認同。