公視新聞網 https://news.pts.org.tw/article/596635
警察配拋射式電擊銃 4.5公尺內通壓制歹徒
張君豪 新竹報導 發布時間：2022-08-24 19:15 更新時間：2022-08-24 19:33
https://www.youtube.com/watch?v=ClfqDWyCaTA
台南兩个警察不幸往生，引起外界討論警察當時會當開銃?新竹縣警察局這馬是加強訓練
，而且閣會增加上新的拋射式電擊器，會當佇4.5公尺的安全距離內壓制嫌犯。
相準目標射出去，若是予射著就會受著電擊，兩秒鐘內連鞭倒落去，而且電擊的感覺閣會
延續十幾秒，另外閣有紅外線裝備，用來提懸拍銃的準度。
員警表示，「保持四至六公尺的距離，對阮執法的安全性有誠大的保證，袂予歹人直接傷
害著。」
新竹縣警察局訓練科總教官 葉婉青表示，「建議射程是四點五公尺，有效射程差不多是
六點五公尺。所以阮會使參嫌疑人保持安全距離是上好的防禦。」
新竹縣警察局是佇舊年得著中央配發的新裝備，進前因為疫情暫停訓練，最近才漸漸恢復
上課，想袂到煞來發生台南刣警察的事件，警察局決定加強訓練。
新竹縣警察局訓練科總教官 葉婉青表示，「操作的方式以及法令按怎參電擊銃結合，這
是完全依照警械使用條例內底，猶未到用銃程度的狀況去使用電擊器。」
共射出來的針頭看斟酌，針頭頂懸閣有倒鉤齒，予射著的人想欲走無遮爾簡單，警方希望
這款新型武器，會當提升執勤安全。