公視新聞網 https://news.pts.org.tw/article/594633
電影"流麻溝十五號" 演威權時期女政治犯故事
郭柏均 張育睿/臺北報導 發布時間：2022-08-11 19:15 更新時間：2022-08-11 19:55
https://www.youtube.com/watch?v=8M6NV77Ho-0
用威權時期火燒島女性政治犯做主角的電影《流麻溝十五號》，今仔日舉辦發佈記者會。
前立委姚文智對政治界轉到電影界，擔任這齣電影的出品人。伊講，希望彼个時代予人掩
崁的故事，這馬會使透過電影的方式講出來。
以過去威權時期，佇火燒島的女性政治犯做主角的小說改編電影「流麻溝十五號」11舉辦
發佈記者會。前立委姚文智佇2018年參選台北市長失敗了後，轉戰電影界，擔任流麻溝十
五號的出品人。伊講，希望透過這段威權時期的歷史，台灣人會使更加了解家己的故事。
《流麻溝十五號》出品人姚文智表示，「佇過去彼个失語的時代，逐家攏袂記得、猶是毋
知，攏予人掩崁的彼時代的故事，了解咱今仔日的人權民主自由按怎來，未來咱台灣才會
使佇按呢的道路，繼續發展落去。」
《流麻溝十五號》導演 周美玲講，「前輩的故事，真正誠感動人。」
為著重現1950年代火燒島的歷史場面，姚文智表示，in參國家人權博物館合作，到綠島來
拍電影，過程毋但重建歷史場面，嘛去一寡仔遺跡取景。演員嘛講，導演對in的口音等等
，嘛是誠要求。
《流麻溝十五號》演員徐麗文講，「彼時的方言是袂使講的，阮閣愛真骨力來學所謂的北
京話，所以腔口方面阮三个人，攏有家己綿精的所在。」
《流麻溝十五號》演員 余佩真表示，「愛試看覓共彼个驚惶感，逐工面對生死的驚惶揣
轉來。」
《流麻溝十五號》演員連俞涵講，「（小說）共口述歷史整理甲真頂真，我真佮意透過文
字閱讀來做角色功課，所以這對我來講，是一本非常重要的冊。」
姚文智表示，因為題材敏感，佇籌備佮製作過程，拄著袂少困難，毋過伊希望會使透過眾
人合作，會使親像《賽德克巴萊》、《返校》等等台灣電影仝款，予逐家繼續認捌台灣的
故事。
郭柏均 張育睿 臺北報導